كتب – روماني صبري
أعرب الفنان رامي جمال، عن حزنه الشديد لإصابته بمرض (البهاق)،ما جعله يفكر في اعتزال الغناء، الأمر الذي قوبل برفض شديد من قبل الوسط الفني، وكان كتب "جمال" عبر حسابه الرسمي على موقع التواصل الاجتماعي :" الحمد لله الذي أحبني فابتلاني وقدرني على الصبر.. من فترة ظهرت بقع بيضاء في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة."
وتابع: "رضيت وسلمت أمري لله عشان عرفت إن الزعل بيزوده وكفاية شغلنتي وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللي بقى يقوللي هتتعامل إزاي وأنت فنان واللي يخاف يسلم عليا واللي يسألني هو ده معدي".
مضيفا: "أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني اعمله عشان الناس مش هتقبلك كدة، وفكرت في كلامهم بصراحة".
واختتم:"لقيت إن عندي حلين يا فعلا شكرا لحد كدة على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة إن شكله غريب، والحمد لله على نعمة الأهل لأنهم الوحيدون اللي بيقبلوا الواحد زي ما هو"، ونرصد في السطور المقبلة ابرز المحطات في حياة جمال.
البداية
ولد رامي جمال عبد الوهاب الفقي، بمحافظة المنصورة، وهو ملحن ومطرب مصري، درس في كلية التربية الموسيقية، وكانت البداية الحقيقية له في مجال الغناء من خلال تلحين أغنية فيلم "فرح" وغناها المطرب أحمد فوزي، وأغنية "فين لياليك" للمطرب فضل شاكر.
حياته الشخصية
تزوج جمال من المطربة وخبيرة التجميل ناريمان، وأكد انه سيظل يدعمها ويساندها في مجالها حتى يراها أفضل خبيرة تجميل في مصر، وذلك عقب افتتاح أول مركز تجميل باسمها، وكتب جمال عبر حسابه الشخصي على موقع انستجرام: "أنا في ظهرِك ومعاكي طول ما فيا نفس، ومش هسكت غير وأنا شايفك أنجح ست في مجال التجميل في مصر، ووعد المطرب دين عليه".
الحانة
ولحن جمال لمحمد حماقي العديد من الأغاني منها : خلص الكلام، مش كنت تتكلم، طمنونى عينيك، ليه يا حبيبى، وقت قريب، ياريت، بحبك كل يوم أكتر، هانت، مش معقول،لسه بتخاف، كان مالي، في حضن عينيك، بتداري، كما لحن لمحمد فؤاد : بسهولة كده، خبيني، قلبنا على بعضنا، ولتامر عاشور : هاجي على نفسي، ما بتهزرش، كما لحن ايضا للمطربة شيرين عبد الوهاب أغاني : انا مش بتاعة الكلام ده، لو لسه باقي، ولأمال ماهر : مكانك، مش همنعك، وآخرون.
المشاركة في موسم حفلات الرياض
وكان توجه جمال في أكتوبر الماضي إلى المملكة العربية السعودية، للمشاركة في موسم حفلات الرياض، بحضور ليلة استثنائية للغناء تقدم قصائد الشاعر عبد الرحمن بن مساعد، وشارك فيها من نجوم الغناء محمد عبده وأصالة وعبادي الجوهر وحسين الجسمي.
وبهذه المناسبة كتب جمال عبر حسابه على موقع "تويتر": وصلت الرياض ومتحمس لحضور ليلة استثنائية لشخص وشاعر استثنائي ليلة الأمير عبد الرحمن بن مساعد، شكرا جزيلا على طيب الاستضافة ولي كل الشرف."
ليالينا
وشهد عام 2018 طرح شركة “نجوم ريكوردز”، ألبوم الفنان جمال الجديد بعنوان "ليالينا"، في الأسواق بشكل رسمي، وعبر قناته على موقع "يوتيوب"، وذلك بعد حملة دعائية كبيرة في شوارع وميادين القاهرة.
ويضم الألبوم 17 أغنية وهم "مش كفاية"، و"هاخونك"، و"فووق"، و"مفيش منها"، و"راح لحاله"، "ولولا"، و"من كتير"، و"ماتظلمنيش"، و”دى العيون”، و”بحاول انساكى”، و”ربطتيني”، و”تعيش ليا”، و”جربت انساك”، و”النظرة الأولى”، و”انساها ليه”، و”متكلمناش”.
وشارك في هذا الألبوم عدد كبير من الشعراء والملحنين ، منهم أيمن بهجت قمر، ونادر عبد الله، وبهاء الدين محمد، وأمير طعيمة، وتامر حسين، وتوما، ومدين، ومحمد يحيى، ونادر حمدي، وتميم، وطارق عبد الجابر.
