كتب - أحمد المختار
ناقش الإعلامي " عمرو أديب " في لقائه الأسبوعي مع الفنانة " رجاء الجداوي " في برنامج " الحكاية " علي شاشة " ام بي سي مصر " ، موضوع الخلافات الزوجية و من يبادر بالاعتذار للطرف الأخر و شريكه .
حيث قالت الفنانة " رجاء الجداوي " : " من المهم أن يكون هناك تقبل للاعتذار ، ولا بد من التروي و الهدوء قليلاً و إعطاء الشريك فرصة لتقديم اعتذاره ، أو اعتذارها ، فهناك الكثير ممن لا يجيدون الاعتذار ، و هناك نوع أخر لا يعتذر مطلقاً ، و كلمة الاعتذار لا تنقص كثيراً من قيمة الشخص " .
و تابعت : " هناك الكثير من السيدات التي تجاري أزواجها ، للمحافظة علي المركب زي ما بيقولوا ، و الحفاظ علي مستقبل الأولاد " .
و أكدت : " أن صفة العناد هي أسوا ما يمكن أن يتحلي به الزوجة أو الزوجة في علاقتهم بالطرف الأخر ، فنية الإصلاح هامة جداً ، و ممكن يكون فيه لفت نظر في حالة الخلاف ، مش لازم اللوم و العتاب ، و تسيب البيت و تتقمص و تمشي " .
و بالنسبة لمكالمات المشاهدين :
كشف " محمود " من مدينة طنطا : " لا بد أن يكون هناك تسامح من الزوج و الزوجة ، و دائماً من يضحي هو الزوج ، و بيجي دائماً علي نفسه " .
فيما قالت مدام " محمود " : " هو بيعتذر دائماً ترييح للدماغ ، و عندما أبادر بالاعتذار هو بيدلع و بيسوق فيها " .
و قالت " ماهينور " من الإسكندرية : " الصح إن الغلطان يعتذر الأول ، و الزوج دائماً لا يغلط نفسه و يجيب الغلط علي الزوجة ، حتي أثناء النقاش ، و في بعض الأحيان أبادر بالاعتذار لما أغلط ، و في بعض الأوقات اضطر في النهاية لتقديم الاعتذار " .
و أوضح " هشام " من المحلة : " الشاري اللي عاوز المركب تمشي ، هو اللي بيعتذر ، فالاعتذار ليس بالكلام و يكون بنظرة أو حركة أو لمسة ، حتي لو غلطان ، عشان الليلة تعدي و الجايات أكتر من الرايحات " .
و استعجبت " سلمي " من الجيزة : " الزوجة تعتذر كثيراً ولا يقبل الزوج الاعتذار ، و بيكون في أوقات كتير غلطان ، و يقعد يومين تلاتة من غير ما يكلمني ، و يسيب البيت و يمشي ، لأنه في أغلب المواقف بيكون هو اللي غلطان ، و أنا زوجة مطيعة لدرجة إني فكرت إن الاعتذار بيقلل مني ، و بيسوق فيها " .
فيما قال " سعود " من القاهرة : " أنا سعودي و من أهل المدينة المنورة ، و طالب " أديب " بفتح ملف الجرائم العثمانية في الحجاز " .
و ذكرت " فيكي " من القاهرة : " الراجل دائماً مبيعتذرش ، و الست بتكبر و بتفوت ، و لو معملتش كده ، الحياة مش حتعدي ، و مينفعش نقف عند كل حتة و كل خلاف ، و نسب الطلاق الكبيرة في مصر خير دليل علي ذلك ، و لازم نقعد و نتكلم ، و في بعض الأوقات الحوار مبينفعش ، و لما الواحد يأخد موقف ، بيخلي الشخص التاني يرجع في كلامه " .
و قالت " لويزا " من القاهرة : " حلقة اليوم عجبتني كتير ، فإحنا بنات بنزعل علطول عشان يجي هو يعتذر ، علي أي حاجة بقي ، فالستات بتحب تمثل و تتدلع ، و الطرف التاني يعتذر و يهتم ، و لو معملش كده مينفعنيش ، و بعد كده اعتذرله بطريقتي و أطبخله و ابعتله رسايل حلوة ، و غصب عنه حيرضي ، و حيجي جري يعتذرلي ، و لو غلطانة هو اللي حيعتذر برضه " .
و أضافت " أيتن " من القاهرة : " بحب لما أبقي غلطانة أعتذر، و بكون مبسوطة و بحس براحة نفسية ، و لو غلطان و موقف يحتمل أنه يعدي فلازم يعدي عشان الدنيا تمشي طالما مفيش أذي نفسي ، و في مواقف تانية مينفعش يكون الاعتذار لمجرد الاعتذار " .
فيما قالت " جيجي زايد " مقدمة فترة الطبخ بالبرنامج : " لا يمكن اعتذر عشان أعدي موقف ، احتراماً لعقل اللي أدامي ، فالناس الضعيفة هي اللي بتخاف تعتذر ، أبويا علمني إني لازم اقتنع الأول قبل أي حاجة " .
و كشفت " ابتسام " من المنيا : " عندنا في الصعيد الراجل بيتعلم إنه ميعتذرش ، و احنا اللي ربينا الذكور كده ، و أنا ربيت ابني إنه ميعتذرش ، فالزمن مختلف شوية ، و اللي مبيساعدش في البيت بيشوف نفسه أنه أعلي من الطرف التاني ، و مش حيعتذر ، و نفسي الراجل و الست ميكونش في اعتذار منهم ، و المشكلة الصغيرة بينهم مش لازم يكون في لوم و عتاب "
لمشاهدة الفيديو اضغط هنا
