كتبت – أماني موسى
قال أحدهم، ابني متزوج من 3 سنوات ومن أول شهر في الزواج مش طايق مراته وهي كمان مش طايقاه، والكنيسة حاولت تصلح بينهم لكن بلا فائدة، وهي قالت للكنيسة أنه لا يصلح للزواج، وذهبوا إلى المحكمة.
ورد القمص مكاري يونان، كاهن الكنيسة المرقسية الكبرى، إزاي يحصل دة وإحنا بنعلم الناس أن بيوتنا المفروض تكون بيوت صلاة وبيوت بركة، وأن العيلة هي الكنيسة الصغيرة، ونعلم الناس أن الزوجين في يوم الإكليل يحل عليهم الروح القدس ويصبحون واحد!!
وتابع في الاجتماع العام أمس الأحد، الفكر بقى رايح للعالم ومحدش بيتعلم، والمحبات الغريبة ملكت على قلوبنا والعيون طاشت، اللي جري ورا المال وآخر ورا الشهرة والمركز، وكل دة سراب، المال سراب والشهوة سراب واللي بيجري وراهم مش هيشبع، اللي بيجري ورا العالم مش هيشبع.
وشدد، اللي بيجري ورا شهواته مش هيشبع وهيقع، البيوت نعمة كبيرة ربنا أداهالنا، ولازم نحافظ عليها، والمفروض الزوجين يسلموا بيتهم وحياتهم من أول لحظة في حياتهم الزوجية لربنا، البيوت المسيحية محتاجة تعرف ربنا
