د./ صفوت روبيل بسطا
قالتها زمان ستي فهيمة .. البعد عن الناس ده غنيمة
ومن بعدها خالتي ونيسة .. قالتها ومن فترة وجيزة
ومازالت الست تفيدة .. تكررها هي وصاحبتها فريدة
ولما سألت جدي متياس.. عن أصل الحكاية من الأساس
قلت له هو ليه الناس .. دايما بتحب تبعد عن الناس ؟
فكر شوية وهرش في الراس .. وبص لي بصة كلها إحساس
قالي دي حكاية قديمة يا أبني..أنا هاقولك وأسمع مني
لو رجعنا لقديم الزمان .. مع بدايات خلق الأنسان
أبونا أدم كان عنده أبنان .. هابيل وقايين وكانوا إخوان
قام هابيل إتقتل من أخوه قايين .. بعد ما كانوا مع بعض عايشيين
الكره والغيره بين الأثنين .. الأخ يقتل أخوه ! ده فعل شياطين
جه بعدهم أبونا إبراهيم .. أب البشرية وفي الإيمان كان عظيم
خاف يحصل مع إبن أخوه .. اللي حصل مع جده هابيل وأبوه
قال له : نعتزل يا لوط .. تختار ونقسم مع بعض الحدود
دي مش كراهية يا أبني .. دا البعد غنيمة وأنت غالي عليا
أنا عاوزك تبعد عني .. لكن قلبك يكون قريب مني
ومرت الأيام والسنين .. والناس بقيت أصعب من الشياطيين
كره وغيره مافيش محبة .. ونسينا إن أحنا أتولدنا مسيحيين
مع أننا إتعلمنا الله محبة .. من الكنيسة ومن وصايا الأنجيل
وأستمر الحال ومافيش محبة.. وهكذا من جيل إلي جيل
حتي جه عصر الكورونا .. وفي البعد عن الناس أجبرونا
جت الأيام اللي في البيت حجزونا .. وعن كنيستنا بعدونا
عن العمل والفسحة منعونا .. ومن السلام والحضن الدافي حرمونا
مترين عن بعض فرقونا .. وبعدونا عن الناس اللي أحبونا
فأنا رديت وقلت لجدي متياس .. اللي كان بيحكي وكله إحساس
من يومي أحب أبعد عن الناس .. وأحب أكون بعيد عن وجع الراس
صدقني أن أحب كل الناس .. حاشا أن أكره حد من الأساس
أنا أحب البعد والأعتزال..وأحب الوحدة وراحة البال
ولما أبعد ألاقي اللي يقرب .. لا يتركني في حالي وأسمع أقوال
وأغير مكاني لمكان تاني وأجرب.. بس برضو أجد نفس الأفعال
فقالي جدي متياس .. اللي كلامه حكمة وكله إحساس
خدها يا أبني مني نصيحة.. وأبعد علي كد ما تقدر عن الناس
وأهي كورونا عملت اللي ماقدرش عليه الناس.
