كتب : د. مينا ملاك عازر
عن النجاح قالوا: كل لحظة تقضيها مع شخص عظيم، تخليك تندم على كل يوم ضيعته مع شخص تافه، اختر رفقاء الرحلة بدقة شديدة، أنت هتكون زيهم غصب عنك.
النجاح في الحياة مش أنك تشتغل 24 ساعة على حلمك، ولكن أنك توازن بين الشغل والراحة، لأن وقت الراحة هو أروع وقت تنتج فيه أفكار وإبداعات توصلك بسرعة.
سرعة زوال المشاعر الإيجابية أكبر بمراحل من سرعة زوال المشاعر السلبية، يعني لحظات الفرح والانتصار بتخلص بسرعة جداً، الخلاصة: لا تربط سعادتك بلحظة تحقق الحلم، لأنها لحظة سريعة جداً ولكن اربط سعادتك بكل لحظة بتعيشها دلوقتي.
إذا كنت أفضل واحد في شلتك، غير الشلة أو ضيف عليها شلة جديدة أقوى وأكتر ايجابية.
الأصل هو أنك تكون مبسوط وسعيد ومستمتع طول يومك، كونك تعيس مكتئب حزين يبقى أنت لسه ما فهمتش الحياة المفروض تتعاش ازاي.
فشلك عمره ما يقدر يسجنك، لأنه ما عندوش أي دليل ضدك، خوفك منه هو دليله الوحيد!
الناقدين والكارهين، هما ناس نفسهم يكونوا زيك بس مش عارفين، فبدلاً ما يطوروا نفسهم يطلعوا طاقتهم في محاربتك، اشفق عليهم وسامحهم، هي مشكلتهم مش مشكلتك.
كل ما تحقق حلم تطمح لأضعافه، الأصل في رغباتك الاتساع والازدياد، وده يخليك لا تتعلق بحلم أو هدف معين، ولكن تعلق بالرسالة والرحلة والنية الخالصة.
مش محتاج تبالغ في التعبير وتقول اتغيرت 360 درجة لأن ده معناه أنك لم تتغير أصلاً، دايماً المبالغة في أي شيء مالهاش معنى.
نادراً ما تلاقي حد عنده حرقة الحلم اللي عندك، اختر شركاء حلمك بعناية، لو مش بيولع قدامك من الحماس إكس عليه.
طالما صحيت من النوم النهارده يبقى لسه ربنا عايزك تعمل شيء مفيد لنفسك وغيرك وآخرتك، استغل يومك صح، لو ما فيش أمل فيك وما لكش لزمة ماكانش رد لك روحك تاني.
اتعب اتعب تلعب تلعب.
كل ما تكون صعب على نفسك الحياة، تكون سهلة عليك، وكل ما تكون سهل على نفسك الحياة تكون صعبة عليك.
خليك عاقل ومتزن في كل شيء في حياتك، إلا تطوير نفسك، خليك مجنون وجعان وذو شراهة مخيفة للعلم وستحصل على عشر أضعاف مجهودك ووقتك وفلوسك.
مش معنى أن شخص سلك طريق ونجح فيه، أنك تسلك نفس الطريق عشان تنجح مثله، دور على طريقك، طريقك زي بصمة صباعك، فريد لم ولن يتكرر.
اسمع رأي الناس فيك خد الإيجابي منه، وأعمل mute للسلبي المحبط منه، لأن الأخير هو الأغلب، وخصوصاً لو من أقرب المقربين منك.
عندما تتآمر كل معادلات الأرض ضدك في طريق أحلامك، تذكر أن معادلات السماء لها حسابات أخرى.
لطلبة الجامعات: خصص يومين بالكتير للمذاكرة خلال الأسبوع، وبقية الأيام قضيها في تطوير نفسك بالتدريب والاحتكاك والأنشطة الجديدة، هو ده اللي يصنع مستقبلك، لكن شهادتك لا تعدو ورقة رسمية تستخدمها في الإجراءات فقط.
أحسن الظن بالناس في جميع الأحوال، أنت أول واحد ترتاح.
وأخيراً أنجح وأسعد ناس في الحياة هما اللي عندهم ذاكرة سيئة تجاه أحداث ماضيهم السلبي، لو سمحت كسر الميموري كارد بتاع الماضي، وأبدأ على هارد جديد.
