الأستاذ / محمد محيى خطاب
 
مع قرب عيد ميلاد الصفحة الخامس ..

حلم بدأ شخص واحد ولاب توب وموبايل .. معاناة وتكفير فى الأول , ثم شوية شوية المفاهيم بتتصلح ثم اللى بنقوله على الصفحة كله اتنقل مننا بالمسطرة وبقى فى مصطلحات إحنا اول من استخدمها بقت دارجة عند الناس ..

الناتج الإجمالى للصفحة اكترن 14 الف بوست وصفحة وصورة ومقال اكتر من 8 الاف رسالة تحمل سؤال او طلب كتاب جاوبناهم ,, مكتبة تابعة للصفحة فيها اكتر من الفين كتاب من مراجع علم المصريات من المتاح اونلاين

لقاءات تلفزيونية واذاعية الحمد لله أكتر من اى حد إتكلم فى تاريخ مصر فى مكان زى الفيس بوك .. جولات اثارية تثقيفية داخل القاهرة وخارجها ..
مفيش موضوع فى تاريخ مصر القديم ما إتكلمتش فيه , مفيش حاجة الا وشرحتها الحمد لله ..
تقدر تتأكد من كلامى بسيرش بسيط على الصفحة عن اى موضوع فى تاريخنا وهتلاقى عنه على الأقل معلومة او اتنين مهمين او حتى مقال مفصل ..
بيشتغل معايا على الصفحة ( بشكل تطوعى) ناس محترمين منهم متخصصين ومنهم لا , الهدف اللى بيجمعهم هو حب تاريخ مصر بإعتباره اصلنا وفصلنا .. بنتعامل مع تاريخ مصر مش باعتباره من الدواجن ( نظرية الدواجن دى هو ان التاريخ بس نقراه وخلاص بس الأولوية تاريخيا لفترات تانية او حتى تاريخ دول تانية) وما اتخذناش برضو التاريخ كوسيلة للشهرة اولم اللايكات او جذب الإنتباه او حتى الفلوس , وما بننشرش تاريخ مصر كفقرة على الهامش كده علشان برضو نلم كل الإتجاهات على الفيس بوك وكده وما حصلش إننا هبدنا مثلا علشان نجذب إنتباه او حتى خلطنا الدين بالتاريخ بالزور علشان نلعب على عواطف الناس ونبتزهم ..

ببساطة حاجة درسناه وبنعرضها للناس وهى حاجة متمكنين فيها مش بنحب نخرج عن إطارها علشان ما نبقاش بنفتى وعلشان ما بنحبش نفتى .. بنتكلم على اللى نفهم فيه يعنى وبس ..

تاريخنا هو أصلنا وفصلنا والحاجة الوحيدة اللى بتخلى العالم يبصلنا نظرة إحترام وتقدير ..
أول ما بتيجى سيرة مصر قدام أى شخص على الكوكب تلقائيا بيفكر فى الأهرامات ...

ممكن حضرتك تقرأ بوستات تعجبك , وبوستات ما تعجبكش دى طبيعة الأمور فمش لازم تدخل خناقة يعنى , ممكن تكمل سكرول وهنكون شاكرين وممنونين جدا وكفى الله المؤمنين شر القتال .. ممكن تقرأ بوست تعليمى مليان معلومات حرفيا هى تلخيص عشرات الكتب ( ودى بوستات محدش بيقراها غالبا إلا المهتم) .. وممكن تقرا بوست جدلى مثلا بنحاول نوصله بأسلوب الصدمة للقارىء ..

هتلاقى فيديوهات من كل مكان فى مصر , هتلاقى برنامج كمتولوجى وده بيتشرح فيه موضوعات فيما لا يتجاوز 10 دقايق بتتعمل فى 10 ايام وساعات اكتر من تجميع مادة علمية والحرص على صحتها . هتلاقى مقالات مطولة ,, مكتبة فيها اكتر من الفين كتاب .. وهكذا ..

رسالتنا موجهة للمهتم بتاريخ البلد العظيمة دى , ما بنحبش ندخل فى مهاترات من نوعية ( وايش عرفك انهم اجدادك ههههخخخ , اصل دول كفار , اصل منهم فرعون وانا ما بفتخرش بالكافر , الفراعنة وصلوا الفضاء وسخروا الجن وعبروا المانش ) الى ما آخره من المفاهيم المغلوطة الشعبية التى تحولت لخرافات تسيدت الموقف تماما ..

نحترم حق أى شخص فى السؤال عن موضوع طالما بإحترام وبننأى فورا عن اى منقشات غرضها فقط فرض شخص لخرافة ليس بغرض النقاش ولكن لفرضها على الناس وخلاص باعتبار ان اللى بيتناقش فيه علم .. بنعتذر عن النوع ده من المناقشات ..

ونحب ننوه إننا وقعنا فى جميع انواع التصنيفات , اتصنفنا كل حاجة تقريبا لرفضنا اتباع مبدأ ما يطلبه الفيس بوك وعلماؤه ..
رسالة أخيرة لكل متابعينا من زمان والناس الجديدة من محبى التاريخ المصرى القديم فى شتى بقاع الفضاء السايبرى للشبكة العنكبوتية ,, كون إننا نوصل لواحد منكم معلومة تفيده فده شرف كبير أوى لينا وإحنا فخورين جدا بيكم علشان تنقلوا رسالتنا دى لكل اللى حواليكم , ونوعدكم مش هنخذلكم ابدا وهتفضل الصفحة أكبر منبر لتكريم التاريخ المصرى العظيم والدفاع عنه كرسالة للأجيال القادمة اللى يمكن تقدر التراث العظيم ده التقدير اللى يليق بيه .. ومش فى نيتنا ابدا إننا نغير من توجهنا مهما كانت الظروف ..

بنرحب بأى صيغة سؤال فيها إحترام متبادل , مش بنرد على اى سباب او تجاوز ولا بنحبه ولا بنحترم اللى بيعمل كده , ولا بلتفت لأى حد بيروج مغلوطات او خرافات وعاوز يفرضها على الناس بالعافية .. او حتى شبه العلم المستفى من سيرش جوجل ..
نحترم الللى بيحترمنا وبنقف على مسافة واحدة من كل الاديان والمعتقدات والاعراق والاثنيات ..
أجدادنا أمنوا بالعلم والعمل ..
أتمنى الخير للجميع ..
يومكم سعيد ..