إعداد وتقديم : بيتر عاطف
لو خدمة الاتصالات في الوقت الحالي مش عاجباك لازم تعرف ان دلوقتي احسن بكتير جداً عن اول ناس اتكلموا في اول تليفون في مصر من اكثر من 150 سنة تقريبا
هنوضح في الحلقة دي تاريخ تتطور نظام الاتصالات في مصر من وقت بدايته الى الوقت الحالي
من الاف السنين اهتم المصري القديم بالبريد كنوع من اتصال المدن ببعضها وده عشان يقدر الملك يتابع اللي بيتم في المدن والقرى الموجودة في كل انحاء المملكة ، واخبار الزراعة والحصاد ، والأسواق واللي بيتم فيها ،
وكان البريد في الأول قاصر على الرسائل الملكية والرسائل الحربية فقط ، وشوية بشوية توسعوا كخدمة مدفوعة الأجر للتجار والأعيان
وبعد احتلال مصر من الأمبراطورية الرومانية ، اهتم الرومان بالبريد وتقدموا فيه نظرا لأتساع الأمبراطورية ،
ومن بعدهم مشيوا العرب على نهج الرومان في نظام البريد
ولكن في ايام استقلال مصر عن الدولة العباسية اختفى نظام البريد وانقطعت كتير من اخبار البلاد الثانية عن مصر ،
وفي عهد السلطان صلاح الدين الايوبي بيبدأ عهد جديد من الأهتمام بالبريد وجعل كتيبة مخصصة للبريد ، وطبعا اقتصرت على الاخبار الحربية والرسائل فقط .
ومع دخول الحملة الفرنسية الى مصر عام 1798 م خصص الفرنسيين كتيبة للبريد ونقاط تمركز بين المحافظات لسهولة تداول الأنباء وكانت بصورة منظمة واكثر تطور وسرعة من الطرق القديمة الي كانت موجودة في مصر .
وبعد رحيل الحملة الفرنسية ولما اصبح محمد علي باشا هو حاكم مصر سار على نفس اسلوب الفرنسيين في نظام البريد واستخدم نفس نقاط التمركز بتاعتهم ولكن برضه استخدامه كان حكومي او حربي فقط ، ومش لعامة الشعب.
في عام 1845 م ظهر اختراع التلغراف في أمريكا على يد "صمويل مورس" ، وبدأ انتشاره في اوروبا عام 1850 ،
وهو عبارة عن جهاز ارسال واستقبال بيرسل نقط وخطوط وكل نقطة او خط بشكل معين بيمثلوا حرف معين من الحروف الابجدية
وكان نظام الارسال ده معروف باسم شفرة مورس
وظهرت في مصر عام 1854 وكان مملوك بالكامل لمصلحة السكك الحديدية ومقتصر عليها فقط وتم افتتاح أول خط بين القاهرة والإسكندرية ،
و بعدها بفترة قصيرة ونظرا لموقع مصر الجغرافي بين 3 قارات ، تم توصيل خط دولي ( بحري ) من أوروبا للهند مرورا بمصر
وبكدا اتصلت مصر باوروبا وأسيا ، وبقى لها الريادة بين دول العالم في مجال الاتصالات .
وزادت خطوط التلغراف الي في مصر
وتم مد خطوط تربط بين مصر والسودان اللي كانت وقتها تحت الحكم المصري
بالأضافة الى خطوط اضافية للأتصال بمدن في الشام زي ( غزة وعكا وبيروت ودمشق وحلب ) ،
وخطوط اضافية بتوصل لمدن في الحجاز زي ( مكة والمدينة ) .
في عام 1876 تمكن العالم الأمريكي "جراهام بيل" من تسجيل اختراعه لنقل الصوت عن طريق الأسلاك واللي اتعرف باسم ( التليفون ) وتم تأسيس شركة باسمه
وقامت الشركة دي بتوصيل كابل الخدمة بين القاهرة واسكندرية في 1881 م وبكدا برضه تكون مصر من دول الريادة في استخدام التليفون .
وبعدها بسنة بيدخل الأحتلال البريطاني لمصر في سنة 1882 واللي بيستولي على جميع خطوط الاتصالات و السكة الحديد وبيعمل على زيادة عدد الكابلات في مصر ، فدخلت كابلات التليفون في بورسعيد والأسماعيلية والسويس والصعيد والسودان
في عام 1918 اسست الحكومة المصرية شركة باسم “ مصلحة التليفونات والتلغراف " واشترت جميع خطوط التليفون والتلغراف ومكاتب الخدمة من السكك الحديدية ، وبكدا بقت محتكرة الخدمة ، ومن هنا بدأت ادارة الدولة لمجال الأتصالات بعد ماتم انتشاره بفترة طويلة
وفي سنة 1926 تم انشاء سنترالات في القاهرة والاسكندرية وزادت عدد خطوط التليفون اكتر في مصر ودخلت منازل اكتر
في عام 1928 قامت شركة "ماركوني" بتركيب اول محطة ارسال واستقبال هوائي في مصر علشان الأتصالات الدولية ،
وفي 1932 بيتم مد كابلات ارضية للتليفونات بين القاهرة واسكندرية والأستغناء عن الكابلات الهوائية بتاعة التلغراف ودا بيخلي الصوت انقى واسرع بين المحافظات .
في عام 1932 تم عمل اول ربط لاسلكي بين مصر وانجلترا
وكدة اتصلت مصر بدول اوروبا بتكلفة أقل وبجودة اعلی ، وزادت عدد الدول اللي تقدر تتصل بها من مصر زي الهند وكندا وجنوب أفريقيا وامريكا واليابان وكان وقتها سعر المكالمة الدولية هو 150 قرش ودا كان مبلغ كبير في وقتها
وبعد ثورة يولي 1952 كان عدد المشتركين في خدمات الأتصالات في مصر كلها 62 ألف مشترك ، وبدأت الصناعة تتطور في مصر فبقت تصنع كابلات الأتصالات بدل استيرادها
وفي السبعينات ومع دخول مصر عصر الأنفتاح واللي شهد تدفق رؤوس الأموال الأجنبية للأستثمار ، فكان لابد من تطوير الخدمة ، فتم إنشاء محطة للاتصالات عبر الأقمار الصناعية بدل الاسلاك في المعادي في سنة 1974
وتم تشغيل خدمة التليفون في السيارة سنة 1975 الي كانت طفرة كبيرة في مجال الاتصالات
في الثمانينات ظهرت خدمات الفاكس لتبادل المستندات الورقية عبر الكابلات
وفي التسعينات شهدت مصر طفرة في مجال الأتصالات بدأت بظهور اول استخدام لشبكة الأنترنت في مصر سنة 1992 وكان مقتصر فقط على الجامعات ومركز المعلومات ، وده بالتعاون مع شركة ( بيت نت الفرنسية )
وفي بداية سنة 1994 تم ادخال الخدمة للوزارات والهيئات الحكومية ، وفي سنة 1997 بدأت شركة الأتصالات في خصخصة خدمات الأنترنت وبدأ الانترنت يدخل المنازل المصرية
في عام 1996 شهدت مصر دخول أول خدمة للتليفون المحمول ( الموبايل )
وظهرت شبكات جديدة في مصر زي موبينيل واتصالات وفودافون ، وتم منحها خدمة التزويد بالأنترنت فظهرت تليفونات الجيل الرابع واللي بقا لها القدرة على التواصل بصورة متطورة أكثر ماحدش كان يتخيلها قبل كدا .
تاريخ طويل مرت به مصر في تطور طرق الاتصالات منذ الاف السنوات وكان لمصر الريادة في دخول انظمة الاتصالات الحديثة بين دول العالم
مراجع المعلومات :
موقع المصرية للاتصالات الرسمي – التاريخ
الهيئة العامة للاستعلامات - البريد المصرى .. تاريخ عريق ...ومؤشرات عامة
ويكيبيديا الموسوعة الحرة
