الست صفية ومجلس المرأة

شوفوا كل الهدايا المأفورة  اللي حصلت عليها الست صفية   ..واللي وقفت بلد بحالها  من شعب  و حكومة وقادة  على رجل ..

 

كل دا مش فارق  معايا ...اللي يفرق بجد هو تعينيها بالمجلس القومي للمرأة (مش  تقليل من قدرها إطلاقا .. )

ورغم أنها  حاتكون  السيدة الوحيدة بالمجلس النسوي  اللي أخدت موقف إنساني  واضح مدافع و شجاع  ..

 

لكن  هنا الكلام  ودا لأكتر من سبب ..

 

أولا  .. لأني أكتشفت   فجأة  أن عندنا مجلس قومي للمرأة .. لا أسكت له الله حسا ..فجأة طلع  له حس ..وبيقدم ورد  .. واللي   مابنسمع عنه  غير أيام الانتخابات البرلمانية فقط  مع شوية  شعارات لوزعية زي حق المرأة  في البرلمان ..ماعلينا ..

. 

ثانيا .. وهو سؤال..  إيه الحكمة الجبارة   من ورا  تعيين  الست المصرية الطيبة دي  بمجلسكم الموقر  وتحولوها  بعد كدا لقالب نسوي مصمت   مالهوش أي  لازمة  وبلا نفع  ولا فاعلية  . ..ماهي كانت ست الستات  وزي الفل بتتصرف بطبيعتها وبأخلاقها  الحلوة  بين ناسها  وأهل حتتها ..يعني دي   مجاملة مثلا   ولا   هو إثبات  حضور ..؟! 

..

طيب  كنتم   فين  من ملايين الستات اللي بتتعرى وتغتصب وتتعرض للتحرش والانتهاك  الجسدي والنفسي جوا وبرا البيت ألف مرة ...وانتو عارفين كويس أوي  الأثار  النفسبة المدمرة  لكل أنواع العنف والقهر على الستات ..

 

* كنتم   فين  من   ملايبن البنات الصغيرين دون السن من ارتداء الحجاب والقضاء طفولتهم وضفايرهم وألعابهم.. وفين أنتم  من حماية  البنات اللي بتخلع الحجاب  كحرية شخصية وتتعرض لكل أنواع التنمر والتهديد و الأذى والسباب  والإهانة النفسية  من كل ذكور المجتمع  بما فيهم  النساء الذكوريات ..

 

*أنتو فين من جرائم الختان والتعدد وقضايا الطلاق والرؤية والابتزاز اللي تتعرض له الستات  كل يوم  لمجرد أنه  لاعائل ولا مورد اقتصادي لها  ولا مكان  يحميها  ..والمحاكم الأسرية تشهد ..

 

*أنتو فين من قضايا المراهقات والزواج العرفي  وحماية المطلقات والأرامل وغير المتزوجات  لكل مايتعرضن له من نظرة مجمتعية مبتذلة  وسوء سمعة مسبقة  وملاحقات رخيصة  بل وتضيق فرص العمل أمامهن ..

 

*انتو فين من قضايا اختفاء القبطيات المنتشر واللي بيؤثر  جدا على سلامة  واستقرار الأسرة المصرية ..

 

*,انتو فين من كل ما تتعرض له البنات الصغيرات الفقيرات  من كل استغلال جسدي وتعذيب بدني سواء  من الأهل أو الأقارب أو  في محيط الخدمة بالمنازل ...وأظن القصص تسد عين الشمس وكلها طازة . 

 

..*انتو فين من كل مايحدث من  تجاوزات إنسانية مريعة  بدور الأيتام  وزوي الإحتياجات الخاصة ودور المسنين .وبرضه الفديوهات مسمعة مشاء الله ..

 

*انتو فين موقعكم  بالظبط  من كل الفتاوى الشاذة والمتسخة أخلاقيا والمهينة لكل النساء بلا استثناء بما فيهم أنتم   وجميعنا  حتى اصبحنا مجرد  ثقب  في كتلة لحم  رخيصة لقضاء الحاجة الجنسية الذكورية فقط .. .

 

*  طيب فين  مكاسب المرأة الخطيرة   ومسيرة النضال النسوية  الطويلة  المفتخرة  واللي اتكتب  فيها  عشرات الكتب والأبحاث   والشعارات (كله شعارات على ورق )  بينما أقصى طموحنا   هو الحصول على أدنى الحقوق الإنسانية  للبشر  أن نمشي نحن النساء في شوارع  المحروسة   بأمان  وبلا خوف ..

 

*ويبقى سؤال  .أين قضايانا تحت القبة ..فين  دوركم  من حتمية  وسرعة تفعيل القوانين لحماية النساء  والمطالبة بكافة  حقوقهن الانسانية  كسائر نساء العالم المتحضر  بلا تنازل أو نقصان أو تأويل  ..ولماذا أنتم بمعزل هكذا عن   سائر نساء الشارع  المصري بكل حارة وقرية وزقاق  ..تعرفوا ايه انتو عن مشاكل الستات  بجد ..!

 

بكل الأسف كلنا مشوهون ..كلنا من نفس المجتمع المتهريء  بفعل  غياب القيم الإنسانية  والجمالية المتحضرة  ...كلنا  بتنا نسير  مخدرين  وخائفين  تحت ظل عباءة مولانا الجاهل ..

 

ياحضرة المجلس القومي للمرأة..  سيبوا الورد من إيديكوا وسيبوا  الست المصرية الجميلة دي  تعيش حياتها   بفطرتها الإنسانية المثمرة .. سيبوها ولاتصبغوا عليها نمط  أفكاركم  المرتعشة  والمنعزلة .. وشكرا