مؤمن سلام
"ماكرون خنزير فرنسا" ده تريند على تويتر دلوقتي، لازم لما تشوفه تضحك لأنك حتعرف على طول حجم محدودية العقل الجمعي للناطقين بالعربية وعدم قدرتهم على فهم الأخر حتى من أجل محاربته.
أولا ماكرون هو رئيس فرنسا الديمقراطية بلد الحريات مش رئيس دولة ناطقة بالعربية الرئيس فيها مقدس ولا يُسأل عما يفعل، يعني ببساطة شتيمة ماكرون مش حاجة جامدة وشجاعة أخر حاجة، يعني الراجل متعود يتشتم من شعبه والشعوب الأوروبية والشعوب المجاورة ومن يلحق بها من شعوب.
ثانيا الخنزير في الثقافة الغربية ليس بالبشاعة الموجودة في الثقافة الإسلامية واليهودية يعني مش شتيمة أوي واللي حيتابع أى برامج أطفال حيلاقي ان في خنزير كيوت وحلو والولاد بيلعبوا معاه يعني حاجة كده زى الكلب أو القطة عندنا، ولو تفتكروا ميس بيجي بتاعة المابيت شو، يعني لما تقول ماكرون خنزير تبقى زى اللي بيقول على زعيم من المنطقة الضايعة دي، كلب، أكيد أنت عايز تشتم الزعيم بكلمة اقوى من كلب، فيعني كنتوا نقوا شتيمة أقوى من كده شوية
ثالثا ماكرون ولا يهمه شتيمة أى شعب حتى لو كان الشعب الأمريكي ولا الإنجليزي ولا الألماني، فمابالك بشعوب تعيش في القرون الوسطى، هو يهمه الرأى العام الفرنسي والرأى العام معاه في هذه القضية بفضل جهادكم واستشهادكم ولبيك اسلام البطولة
رابعاً مع هذه الشتمية تاتي حملات مقاطعة للمنتجات الفرنسية، وبالرغم من هزلية الحملة لكن أنا حناقشها بشكل جاد. وخلينا ناخد مصر نموذج
1- مصر بتستورد من فرنسا بقيمة 1.77 مليار دولار عام 2019 وبتصدر بقيمة 664.64 مليون دولار، حفترض ان حملتك كانت جامدة وقوية وذات قوة قتل ثلاثية وتوقف استيراد مصر من فرنسا، تعتقد فرنسا حتعمل ايه؟ حتوقف استيرادها منك طبعاً، طيب وتعتقد الإتحاد الأوروبي حيقف مع مين في هذه
الحرب التجارية؟
2- نوعية الواردات المصرية من فرنسا هى ايه؟ أحب اقولك ان المنتجات الرئيسية اللي بنستوردها من فرنسا هى الأدوية (262.99مليون دولار) تقريبا ربع الواردات واتكى على أدوية دي، وبعدها بتيجي السيارات والحبوب والأجهزة الإلكترونية والكيماويات وماكينات المصانع والمواد العضوية والبلاستيك وباقي الحاجات توافه زى البرفان والمكياج (53.58 مليون دولار)
احنا بقى بنصدر ايه؟
أجهزة كهربائية، غالبا ماركات عالميا بتتصنع هنا، سماد، منتجات بترولية، بلاستيك، مواد كيماوية عضوية، منسوجات، خضار، وشوية برفانات ومكياج
يعني ببساطة انت بتحارب طيرات الميراج بسيف خشب
