محمد أبوقمر
الشحط إللي يجي يقولك أنا عايز أتجوز بنتك علشان أكمل نص ديني قوله : روح كمل نص دينك عند أمك ، الزواج ياخويا مش هو إللي بيقولولك عليه المشايخ ، بنتي مش كماله تكمل بها نواقصك وتحل بها عقدك ، إنت عارف مفهوم الكماله ده معناه إيه ، معناه إنك بتتجوز أي واحده والسلام ، كأنك رايح تشتري 2 كيلو طماطم علشان تسبك بهم صينية بطاطس ، وإذا ملقتش في السوق طماطم يبقي برطمان صلصلة ينجزلك المهمة وخلاص ، الزواج حاجه تانيه حالص ، الزواج بناء مؤسسة قوامها الحب والمساواة والتفاهم ، والحب معناه إنك من غير البنت دي مش هاتعرف تعيش ، عينك ما بتشوفش غيرها ، بتشوف صورتها في وش أي واحده تانية ، قلبك بينط جواك لما تشوفها روحك تنقبض لو غابت عن عينيك ، بتحس إنها إنت نفسك ، وإحساسك ده لما يتسرب لها هي كمان تحس إنها إنت ، إنتم الاتنين إيد واحده وقلب واحد وروح واحده .
مسألة إنك تتجوز علشان تكمل نص دينك دي بتنفي إنسانية إللي إنت اتجوزتها ، هي كمان بتبقي عارفه إنك متجوزها سد خانة ، علشان كده عند أول صدام بينكم بتتحول هي في نظرك إلي مجرد صينية مسقعة حمضانة ، وإنت بتتحول في نظرها إلي سلطانية شوربة معفنة ، لكن الزواج إللي قايم علي الحب والمساواة والتفاهم وإيمان كل منكما بإنسانية الآخر بيخلي كل لحظة صدام عبارة عن تجربة فهم جديدة ، بيخلي كل لحظة صدام فرصة لدخول كل طرف في ضمير الطرف التاني أكتر وفهم نوازعه الإنسانية أكتر وبالتالي ينمو حب كل طرف للتاني أكتر.
المشايخ يا ابني بيرددوا كلام مش فاهمين معناه ، وإنت لأنك لطخ بقي الزواج عندك أشبه بإنك اشتريت صينية بسبوسة بالمكسرات تقعد تلغ وتلغوص فيها ولما تزهق ترمي الباقي في الزبالة وتروح تجرب حظك مع صينية بالوظة تانية .
إسمع ياشحط إنت لو قولتلي أنا عايز أتجوز بنتك علشان أكمل نص ديني هاقولك روح كمل نص دينك عند امك.
