إزاى القلوب ممكن تلمس بعضها ؟  وهل ممكن قلب يلمس قلب تانى ؟ هييجى حد يسألنى يعنى إيه ممكن قلب يلمس قلب تانى ؟ هى القلوب بتلمس بعض ؟ طبعا و مش بس كدة فيه كمان لغة للقلوب بتتفاهم بيها مع بعضها هتسألونى إزاى ؟

هقولكم شوفوا بقى القلوب لما تكون متفتحة كدة و صافية و مالية أوردتها بالحب النقى و الشرايين بتاعتها تغذيها مشاعر حارة دافئة مشاعر حب , رقة , رومانسية , إحساس عالى هييجى حد يقوللى دلوقتى طالما إنت قلت رومانسية يبقى إنت بتتكلم عن موضوع خيالى هقولك لأ ياعزيزى إنت فاهم الرومانسية غلط و بدون قطع لكلامى الرومانسية هى إحساس عالى جدا جدا من المشاعر اللى بتوصل لدرجة من جمالها و من خيالها إنها بتوحد حبيبين فى قلب واحد و الرومانسية كمان هى التفكير فى الماضى الجميل بأسلوب رقيق فى شكل حنين إلى دفئه و جماله و ذكرياته الخيال فى الحب هو اقصى و اقوى المعانى لأنك بتوصل بيه لأقصى درجة فى مشاعرك و إحساسك لكن الخيال الواقعى مش مجرد تخيلات أو تهيؤات.

و نرجع لموضوعنا القلوب ممكن تلمس بعض لو وصلت لدرجة من التفاهم  والتناغم والتناسق بينها وبين بعض يعنى لما إتنين سواء كانوا بنتين أو ولدين صديقين أو يكونوا شابا وفتاة حبيبين يكون حبهم حقيقى فى صداقتهم حقيقى فى مشاعرهم حقيقى بيكون جمالهم فى كلامهم فى طريقة تعاملهم مع بعض بيوصل هنا القلبين إلى درجة من التوحد والتكامل فيما بينها بحيث إنهم يلمسوا بعض بيحسوا ببعض إحساس حقيقى مش خيالى يعنى مثلا ممكن إن إنت هنا عايش فى القاهرة و عندك صديقك أو صديقتك عايشة فى هولندا أو المانيا ممكن قلبك يشعر بصاحبك دة إن فيه حاجة غلط إنه مش مرتاح وتحس كدة إنك مش مبسوط مش مستريح فتكتشف إن صاحبك تعبان أو عيّان أو عنده مشكلة معيّتة هنا بتكون القلوب وصلت وصلت لدرجة من التلامس فيما بينها لدرجة إنه يقدروا يفهموا لغة بعض من غير مايتكلموا أو حتى ينطقوا لأن القلوب ببساطة شديدة جدا لغتها هى المشاعر و شفرة اللغات دى هى الحب يعنى لما قلب يكون مشتاق لقلب تانى و نفسه إن القلب دة يروح له يعنى يروح للقلب اللى عاوزه لازم يكون القلب التانى دة هو كمان عنده نفس الشفرة اللى بيها يقدر يستقبل إشارات المشاعر اللى بتترجم لحب لأن كل قلب  و له شفرته المخصوصة واللى من غيرها ماحدش يقدر يفتح قلب أو حتى يقتحم قلب حد اما لو مكانش عنده شفرة الحب دى فيبقى الحل فى ( الماستر كى ) أو الشفرة الإلهية اللى بتقدر تفتح كل القلوب زى كدة لو كنت قاعد فى فندق و ضاع منك مفتاح غرفتك بتخللى الهاوس كيبير أو عامل الإشراف الداخلى يفتح لك باب غرفتك بالماستركى ممكن حد يسألنى ويقول لى طيب لو القلب التانى ماتلمسش من القلب الأولانى يعنى إشارات الحب ماوصلتوش اصلا يبقى إيه الحل ؟

الحل إنك تجيب ناقل إشارة أو طبق إستقبال تقوّى بيه الإرسال يعنى تعمل كل ما فى وسعك و مافى طاقتك عشان تبيّن حبك و مشاعرك و تحاول تقوّى إشارات حبك يمكن القلب التانى يفهم و يحس بقلبك لكن ممكن تكون عوائق تعطل الإرسال زى الجو الملبّد بالغيوم او مطبات هوا يعنى مثلا تكون فيه عوائق تعطل إرسال حبك ظروف مش مناسبة - ناس بتحاول تسخّن بينكم - ناس مش بتحبكم  ومش عاوزة لكم الخير وتلاقى كدة عدو الخير شغّال جامد هنا لازم ولابد و حتما و ضرورى إنك تستعين بفنى الدش هو بقى اللى ييجى يحل لك المشكلة  بعد ماخلصت كل السبل والحيّل وكل المعوقات و برضه الإرسال مش عاوز يوصل يبقى تجيب فنى دش هو بقى اللى فى إيده الحل ملكش دعوة هيحل إزاى هو فاهم شغله كويس و ادرى منك بطبيعة عمله يعنى تستعين بربنا هو اللى خلق القلوب و هو اللى يعرف يظبطها و يعرف يوّلفها لأنه ببساطة هو اللى خلقها وهو اللى معاه الماستر كى لكل قلوب البشر نصيحة مخلصة : إذا كان مفتاح قلب حبيبك ضاع منك و مش عارف تدخله من تانى اطلب من اللى معاه الماستر كى يفتح لك باب قلبه لأنه فى إيده كل لمسات القلوب وبها يقدر يلمس قلبه وتخلليه يحس بقلبك زى ما كان و أكتر كمان ...تحياتى.