نجاح بولس
لما محامي بيجوز بنته بتكون نقابة المحامين الفرعية كلها في الفرح، ولما استاذ جامعة يكون عنده مناسبة اساتذة الكلية ويمكن الجامعة كلها بتكون حاضرة، ونفس الكلام في حالة المناسبات السعيدة او الحزينة لكل الفئات المهنية قضاة وضباط جيش وشرطة او سياسيين أو اعلاميين او موظفين عموميين ، الكل بيكون متجمع لدعم الزميل صاحب المناسبة ، نظراً للعلاقات الشخصية اليومية بينهم في بيئة العمل
طبعاً هاتقولي الكهنوت مش وظيفة .. دا حقيقي هي خدمة ورسالة ، لكن ماتنساش انهم أولاً واخيراً بني أدمين تجمعهم علاقات شخصية ومشاعر شخصية متبادلة نتيجةً اللقاءات المتكررة او الإتصالات اليومية بينهم ، والعلاقات الانسانية المتبادلة بينهم بتكون منها جزء على المستوى الخدمي والوظيفي وجزء اخر على المستوى الشخصي، ومن الطبيعي لما يكون حد من أعضاء المجمع المقدس عنده مناسبة ، يكون في نسبة من اعضاء المجمع الاخرين على علاقة شخصية بينهم يحضروا ويجاملوه في المناسبة
الحقيقة مش لاقي أي داعي للثورة على حضور ١٣ اسقف لفرح قريب لإثنين من اساقفة المجمع البالغ عددهم أكثر من ١٣٥ اسقف ، لانهم ببساطة حاضرين بصفتهم الشخصية مجاملة لزميلاهما في المجمع وليس بصفتهم الكهنوتية حتى لو شاركوا في طقوس الاكليل ، دا لو مستشار عنده فرح ابن اخته قضاة المحكمة كلهم بيحضروا الفرح مجاملة لزميلهم ، هل وقتها نقول ان القضاة يكيل بمكيالين لانهم مش بيحضروا باقي الافراح !! خلينا نكون منصفين ونعالج الأمور بموضوعية اكتر من كدة
