كتب - محرر الاقباط متحدون ر.ص
قال المستشار نجيب جبرائيل، رئيس منظمة الاتحاد المصري لحقوق الانسان :" كان لسة دم القمص أرسانيوس وديد كاهن كنيسة كرموز محرم بك الاسكندرية والذي استشهد على يد شخص ملتحي، مبردش، عشان تشهد مصر واقعة عنصرية جديدة ضد اسرة مسيحية.
واضاف جبرائيل في بث مباشر عبر حسابه على فيسبوك :" فبعد مرور يومين على دفن القمص ارسانيوس، قام عمال مطعم كشري التحرير بمنع طفلة مسيحية كانت برفقة والدتها من الطعام.
موضحا :" قال العمال ان مدفع افطار رمضان لم يضرب لذلك لن تستطيع الطفلة تناول الوجبة.
موضحا :" والدة الطفلة اسمها سيلفيا، وقال لها العامل : مفيش حد ياكل قبل مدفع الافطار، رغم ان اللي هتاكل طفلة، فراحت للمدير قالها التعليمات بتقول ان مفيش حد ياكل قبل الاذان.
مشددا :" كشري التحرير في نظري انا كرجل قانون ارتكب جرائم وهي : التحريض على اثارة الفتنة الطائفية لان هذا التصرف يحمل دعوة لباقي المطاعم حتى تقتدي به وتمنع تناول الطعام قبل الاذان.
وتابع :" كما اتهمه بتهديد السلام الاجتماعي والوحدة الوطنية كونه شايف المسيحي كافر فمنعه من الاكل في نهار رمضان.
وطالب جبرائيل النائب العام بالتحقيق مع مدير المطعم في تهم اثارة الفتنة الطائفية وتقويض السلام الاجتماعي، وازدراء الدين المسيحي.
لافتا :" عاوزين يروجوا ان المسيحيين كفار لذلك وجب التصدي ليهم، وهذا المطعم بهذا التصرف العنصري جعل المسيحيون يقاطعوه ما يسبب خلل الاقتصاد الوطني.
وكانت سيدة تدعى سيلفيا بطرس كتبت عبر حسابها الخاص على فيسبوك :"
نزلت النهارده جبت بنتي من الحضانة، كان عندها تمرين روحنا جري على هناك وباباها خلص شغله وعدى علينا، بعدما خلصنا بنتي قالت أنا جعانه، قولنا فرصه واحنا بره نعدي ناكل أي حاجه، وبما اننا صايمين ولقينا مطعم كشري شهير في القاهرة ، وشغالين قولنا ناكل ونروح،، قعدنا وطلبنا وجه الاكل، ويادوب البنت بتاكل أول معلقه لقينا واحد من العاملين جاي بيقول ممنوع الأكل قبل المغرب.
قولت له يعني ايه ؟!!! مش ده مطعم ومفتوح والناس قاعده ،، قالي اه الناس تقعد بس محدش ياكل قبل الآذان !!!!، قولت له انت صايم ومستني الآذان براحتك أنا مش صايمه للمغرب وقاعده في "مطعم" والأكل قدامي ازاي ماكلش، قالي هو ده النظام !!!! ولقينا واحد تاني جاي غالباً مديره وبيكرر نفس الكلام.
ف احنا بقى مطلوب مننا نطلع معلقة الأكل من بق البنت ونقنعها انها ماتاكلش في المطعم علشان فيه ناس قرروا يفرضوا ده على غيرهم ؤ هل الصيام بالعافيه حتى على المسيحيين ؟!. ولا هو علشان كتير الواحد بيراعي شعور اللي حواليه فبقى حق مكتسب ونتعاقب لو عملنا العادي أو بنتي جاعت واحنا في الشارع ؟!!.#الصيام_بالعافيه.
تعديل: المطعم بيرد على ناس من اللي اهتموا وبعتوا لهم اننا اخدنا تيك اواي، وان التيك اواي ممنوع يدخل الصاله وده سبب المنع مش الآذان ، الفرع اللي كنا فيه الصالة منفصلة عن مكان الطلب.
انا وبنتي دخلنا قعدنا وجوزي دخل يطلب ولما لقى انهم بيحطوا الأكل في علب على انه تيك أواي قال لهم احنا قاعدين في الصاله هل فيه أي تكلفه زياده علشان ناكل هناك ، وكان الرد لأ يافندم مفيش اي حاجه زياده اتفضلوا .
ولما جوزي جاب لنا الاكل وبدأنا ناكل حصل اللي انا حكيته فوق وقالوا ممنوع قبل الآذان وده بالمناسبة اللي بيأكدوه هم بنفسهم على صفحتهم.
لو سبب المنع هو التيك اواي زي ما بيدعوا، كانوا حتى عرضوا انهم يبدلوا الأكل في أطباق او يطلبوا فلوس زياده للخدمة وده ماحصلش، يعني لو كنا قعدنا واستنينا بعد الآذان كنا اكلنا عادي في العلب اللي بيدعوا انها سبب المنع.
وفي اطار ذلك اصدرت ادارة مطعم كشري التحرير بيانا، ردت خلاله على السيدة سيلفيا بطرس التي قالت ان المطعم منعها من تناول الكشري داخله قبل الاذان، وجاء بنص البيان المنشور عبر صفحة المطعم على فيسبوك :"
توضيح هام لعملائنا الكرام بخصوص ما تم أتهام أدارة كشرى التحرير به من أمس لليوم وهو أتهام غير صحيح.
العميله المحترمه شرفتنا فى فرع سراي القبه الساعة ٥:٥٠م لطلب أوردر تيك أواى ودفعت الحساب للكاشير وأستلمت ألاوردر وألاوردر تيك أواى.
ملحوظة الاوردر التيك اوي غير مسموح بتناوله داخل الصالة، العميله لم تجلس داخل الصاله لان الصاله مغلقه فى هذا الوقت ولم يتم منع العميله او الطفله و اذ حدث غير ذلك فهو خطأ فرد و ليس منظومة و سوف يتم معاقبة المخطأ على الخطأ المرتكب.
ملحوظة لقد تم التواصل مع العميله اليوم وتوضيح سؤ الفهم وتقبلت الاعتذار.
ملحوظة لاعلاقة لهذا الامر بكل هذه الادعاءات فهل تم منع العميلة والسماح لغيرها ؟ نحن نكن كل الاحترام لكل العملاء و لا يجوز التفرقة بين اي عميل فكلنا اخوة ولانعرف هذه النبرة الدخيلة علينا ولم يعهدها احد علينا طوال 60 عامًا.
وهذا لتوضيح ماحدث من لبث وسؤ فهم للمشكلة ، كشري التحرير مكان لكل مواطن.
