د.امير فهمي زخاري المنيا
للأسف لسه عندنا ثقافة (الآنسة️ متروحش لدكتور النسا), طبعا كل حضراتكم تعرفوا الثقافة دى, اللى مفادها ان البنت قبل الزواج لو راحت لطبيب نسا وحد من معارفها شافها هيشك فى أخلاقها, أو على أقل تقديرلوهو حسن النية هيفهم ان عندها مشاكل تمنع الإنجاب بتتعالج منها, وبالتالى محدش هيرضى يتزوجها لأنه هيتفهم إنها عقيم مبتخلفش‼️
على فكرة نسبة كبيرة من الستات اللى عندهم مشاكل متعلقة بالإنجاب, كان السبب فيها إنهم متعالجوش وهما آنسات علشان خافوا يتقال عليهم مبيخلفوش, وكانت النتيجة إنهم بقوا فعلا(مبيخلفوش)‼️
دا غير إن فيه آنسات دفعوا حياتهم تمن للثقافة دى️, لأن جالهم أورام سرطانية متعالجتش لأنهم خافوا يروحوا لطبيب النسا قبل الزواج‼️
يا جماعة البنت بتتولد بجهازها التناسلى, مش بينبت فجأة بعد الزواج‼️
والجهاز ده زى أى جهاز فى الجسم ممكن جدا يصاب بأمراض سواء كانت الأنثى دى طفلة️ وللا بالغة وللا عمرها100سنه متفرقش.
والطبيب اللى شغلته يعالج أمراض الجهاز التناسلى للأنثى هو طبيب أمراض النسا️, زى ما طبيب السكر بيعالج السكر وطبيب الكلى بيعالج أمراض الكلى وطبيب القلب بيعالج أمراض القلب‼️
العلاج عند طبيب النسا مش عيب, سواء كانت اللى هتتعالج آنسة وللا زوجة وللا مطلقة وللا أرملة, كل دول عادى جدا إنهم يعيوا وإنهم يحتاجوا العلاج‼️
يا رب الثقافة دى تتغير علشان نبطل نشوف العروسة اللى رايحة تكشف بعد الزواج بشهرين, علشان البريود بقالها خمس سنين مبتجيلهاش‼️
أو اكتشفت بعد زواجها بشهر وهى عمرها 25 سنة أو اكتر, إن عمرها ما جاتلها بريود‼️
أو الأرملة أو المطلقة اللى بقالها اربع سنين عندها نزيف ومكسوفة تكشف لأنها من غير زوج وخايفة من كلام الناس, ويكتشف إن عندها سرطان فى الرحم وبقى مستحيل علاجه لأنه بقى مرحلة رابعة‼️
دى حلقه من مجموعه حلقات توعية طبية لكافة فئات المجتمع...
د.امير فهمي زخاري المنيا
