كتب - محرر الاقباط متحدون
اجتاح الغضب عدد كبير من رواد مواقع التواصل الاجتماعي في مصر ، لاسيما من خريجي كليات الاعلام ، وذلك خلال الساعات القليلة الماضية، بعدما كشفت قناة فضائية عن تقديم برنامج تليفزيوني لإيمي تاتو، وتعمل في مجال التجميل، والتي اشتهرت بفيديوهاتها على مواقع التواصل، وسبب الغضب كونهم لم يحصلوا على فرصة للظهور رغم انهم يمتلكون ما يؤهلهم للعمل الاعلامي.
وكتب حسام باسم يارا احمد :" عايزة اعيط علي مرمطة ٩ سنين شغل صحفية و معدة ومراسلة .. وعايزة اعيط علي ٤ سنين راحوا في تكليفات الكلية ومشروع التخرج وعايزة اعيط علي الحال اللي وصلنا ليه في الشغلانة ديه.
كما علق حساب باسم اميرة احمد :" جماعه بجد انا لما بشوف كد بتقهر علي نفسي وعلي تعبي وعلي سافري وعلي بهدلتي في كل البلاد عشان بس اتقدم خطوه .. جماعه هو في اي بجد!! يعني مع احترامي ليها كأنسانه اي مؤهلات ايمي تاتو عشان تدخل كل بيت مصري من خلال الشاشه ازي تقعد علي الكرسي الي بنقعد سنين وسنين تعبت وشغل وتدريب عشان بس نشوفه مش نقعد عليه.
فيما راى حسام رضا مقدم البرامج الاذاعية :" من امبارح و فيه حنفيه عياط علي السوشيال ميديا بسبب ان ايمي تاتو بقت مذيعه فاسمحولي اخد من وقتكم دقيقتين بس ارجوكم اقروا الكلام كله و حاولوا تفهموا وجهه نظري قبل اي تعليق و قبل اي هجوم... اولا ايمي تاتو دي ميك اب ارتست لو متعرفش و مشهوره جدا عشان احنا اللي شهرناها مع انها مبتقدمش محتوي .. ثانيا قناه الشمس دي قناه جديده بقالها سنه او اتنين تقريبا و دي قناه خاصه تملكها ست هي اللي عامله اللي قناه بفلوسها .
يعني مش من حقنا اصلا نعترض و نقول ازاي و ده حرام طالما مخرجتش عن أطار الخطوط الحمرا و المخالفات و الشروط و القواعد المعلنه و طالما البرنامج طلع علي الشاشه و متوقفش يعني المجلس الأعلى للاعلام معندوش اعتراض عليه عشان الأخوه اللي داخلين يقولولي انت مش فاهم انا بتهبد انت بتزيط.
طيب كذه معلومه علي الماشي .في كل القنوات الفضائيه فيه حاجه اسمها انك تشتري هوا علي حسابك الخاص و تعمل البرنامج اللي انت عايزه .نيجي بقي لموضوع ايمي عندنا ٢ سيناريو .اول واحد انها تبقي اشترت هوا علي حسابها و عملت برنامج كنوع من انواع الدعايه ليها و ده السيناريو الاقوي السيناريو التاني ان اداره القناه هي اللي جابتها عشان هي معروفه على السوشيال ميديا و هتعمل مشاهدات .
نيجي بقي للسيناريو التاني ده ، الفتره الاخيره معظم القنوات و منتجين الأفلام و المسلسلات و مخرجين الإعلانات و شركات الدعايه بقوا بيدوروا علي مين التريند مين بيعمل مشاهدات مين عنده فولورز و دي بقالها فتره كبيره في الوسط كله بكل أشكاله مش جديده يعني.
طيب نقطه كمان مهمه عشان الصياح اللي شغال بتاع ٤ سنين اعلام و مرمطه و خبره.اولا نص او ٧٥% من مذيعين مصر مش خريجين اعلام اصلا مش معني انك خريج اعلام انك لازم تبقي مذيع و مذيع شاطر و جامد في ناس داخله اعلام عشان شايفين انها كليه سهله ( بياخدوا الصدمه بعد كده ) و في ناس اتخرجت من أعلام و مبتعرفش تتكلم و في ناس مدرستش اعلام اصلا و عندها الكاريزما و الشطاره و اللباقه.
يعني انك تبقي مذيع مش لازم تبقي اعلام و كونك اعلام مش معناه أبدا انك مذيع زي بالظبط فكره ان خريجين حقوق بالملايين بس سؤال هو كل خريجين حقوق بيبقوا وكلاء نيابه؟ لا طبعا، عشان مش معني انك خريج حقوق انك تصلح تبقي وكيل نيابه هل هي تصلح تبقي مذيعه ؟ .معرفش يمكن خدت كورسات يمكن اتدربت و يمكن لا .
هل ينفع اي حد يطلع علي الشاشه ؟.لا مينفعش لازم يبقي متدرب كويس و فاهم يعني ايه إعلامي و كل القواعد و القوانين اللي حاطتها المجلس الأعلى للاعلام .هل لازم يبقي خريج اعلام عشان يبقي مذيع؟مذيعين كتير كبار مش خريجين اعلام.
آخر حاجه بقي حط في دماغك انها ارزاق و الأرزاق دي بتاعه ربنا و بدل ما تصيح و تقول ازاي و اشمعني و حرام اسعي اكتر و اتعب اكتر و اشتغل اكتر متعرفش ربنا كاتبلك ايه و متعرفش غيرك ده ظروفه ايه .حب الخير لغيرك عشان ربنا يكتبلك الخير اللي انت عايزه ايمي تاتو شاريه هوا و عامله برنامج بفلوسها و حط تحت الجمله دي مليون خط و انا لا بدافع عنها ولا اعرفها اصلا ولا مؤيد لفكره ان اي حد يطلع علي الشاشه انا بوضح حقايق في الوقت ده مش اكتر.
كما علقت ندى اباظة :" انا عارفه ان كل واحد بياخد رزقو ونصيبو والله مش ببص علي رزق حد بس لما ابقى في المجال الاعلامي من وانا عندي ١٧ سنه ومعايا شهادات خبرة من الميديا سيتي في دبي و قدمت مهرجانات ومؤتمرات كبيره ومعايا بكالريوس إعلام و تقديري عالي و ابقى قاعدة ف بيتي مقضياها انترفيوز و وعود كدابه و تيجي استاذة ايمي تاتو تقدم برنامج ابقى انا و الي زيي نروح نبيع بلح ...شكراً يا إعلامنا العريق.
وكتبت روبا قاسم :" الكوافيرة إيمي تاتو بقيت مذيعه قد الدنيا .. ولا عزاء للسنين والدراسه وتعب القلب ولا الخبرة ولا شقا وتعب السنين اللي اشتغلناها وحسبي الله ونعم الوكيل في اللي بيدمر المهن بالشكل ده ... أنا أروح أفتحلي كوافير وأعمل تاتو أو أفتحلي كافية أقعد أشرب فيه نسكافية ليل نهار براحتي وأكسب وأبقى زى الفل بدل منا بدور على شغل ومش لاقية و تاتو بقت مذيعة...عليه العوض ومنه العوض ... أنا نمت وصحيت لقيت نفسي بقيت في الحال .
وقال ايمن في منشور :" اقسم بالله حسبي الله ونعمة الوكيل لما الواحد يكون دارس 4سنين اعلام بتقدير إمتياز وشغل ٣سنين مراسل وفي الاخر وحدة زي إيمي تاتو تبقي قاعد علي كرسي مذيع بتقدم برنامج مع إحترامي ليها كانسانة والواحد مش لاقي فرصة في قناة محترمة اي المؤهلات الي عندها تخليها تطلع علي الشاشة مش هقول غير حسبي الله ونعمة الوكيل .
وكتب الاعلامي احمد سالم عبر حسابه الخاص على فيسبوك :" طيب هنقول ايه لطلبة و خريجي كليات الإعلام و هم شايفين إيمي تاتو بقت مذيعة.
