كتب - محرر الاقباط متحدون
ابدى الكثير من رواد مواقع التواصل الاجتماعي، اعجابهم بقس مصري، ظهر في مقطع فيديو (متداول) وهو يحكي قصة حقيقية بخفة دم غير طبيعية.
وقال القس :" رحنا لواحد غلبان فهو ايه قالي ابونا، قولتله نعم، فقالي فز، قولت له اتكلم عدل ايه فز دي انت مفكرني مش راجل لا انا راجل جاي من الوادي الجديد واجدع راجل ايه فز دي .
وواصل ضاحكا :" قالي يا ابونا فز نصلي ، قولت له اذا كان كدة ماشي، وقف قدام ربنا يصلي وقال كلام يوجع البطن : ايه يارب مقادرش تديني واد يعني .
وتابع الرجل مختصا الله في صلاته :" يعني مالي الدنيا ملايين الولاد ومقادرش تديني واد .. اديني واد يارب .. يارب نفسي في واد يشيل اسمي، نروح نجيب بت يتجوزها واحد مايسواش وتمشي.
انا عاوز واد يارب .. اديني واد يارب .. ليه كده ما انت بتعمل معجزات اديني واد يارب.
وتابع القس :" قال كلام عن انه عاوز واد وجعلي بطني، امين، دا في عشرة بينه وبين ربنا، وبعد ما قال امين قلتله يارب ياللي عملت عنين للمولود اعمى والست لمستك من غير سبب كده شافيت نزيف الدم .. يارب ارجوك يارب انظر للغلبان المقطوع من الشجرة ده واديله واد يارب .
اديله واد بشفاعة امك العذراء ، يا ابانا الذي في السموات وصلينا وقعدنا، قولتله تجيبلي ميه ؟، قالي نجيب، جابلي ميه، قولتله انت خلفتك بنات بس ؟ .
قالي لا يا ابونا انا معنديش عيال، قولتله طب قوله يارب اديني عيل يطلع واد ولا يطلع انت كمان بتتشرط عليه وانت معندكش عيال دا انت فقري ، قولي انت متجوز من زمان ؟ .
قال لأ، قلتله امال امتى ؟ قالي انا لسة متجوزتش، يعلم الله قلت له فز ، قالي ايه فز دي ، قلت له فز نصلي وقلت لربنا : يارب اديله عقل يارب .. اديله عقل يارب .
واختص القس الحاضرين الذين راحوا يضحكون :" انتوا بتفكروها نكنة ده على ارض الواقع حقيقة.
وكتب حساب باسم محمد العجمي :" خفه دم المصري. علامه واضحه ع كل مصري حتى في أصعب المواقف والظروف مليوون تحيه لهذا القس خفيف الظل الجميل تحيا مصر بكل أهلها الطيبين.
وعلق ماجد مصطفى :" راجل دمه خفيف والدين بساطه سواء دين مسيحى او اسلامى مش لازم عشان ابقى شيخ او قس ابقى عابس وكشر وقافل فى وشى . وليكم دينك ولي دين . بس الراجل دا عسل.
كما علق حساب باسم بودا محمد :"منى ليك كل الاحترام ع روحك الطيبة.
وكتب شريف طلعت :" خفة دم المصرين ليك مني كل الإحترام والتقدير.
ايضا علق على الفيديو حساب باسم ابو مازن :" روحك حلوه ودمك خفيف وتعبيرك جميل تسلم يا جناب القس.
وابدى محمد اعجابه بالقس قائلا :" خفه دم المصري. علامه واضحه ع كل مصري حتى في أصعب المواقف والظروف مليوون تحيه لهذا القس خفيف الظل الجميل تحيا مصر بكل أهلها الطيبين.
وكتب رضا محمد :" عسل وربنا مصري اصلي الله يديم المحبة.
