كتب - محرر الاقباط متحدون
خيم الحزن على آسر ياسين '>الفنان آسر ياسين ، حيث غيب الموت مساعده، ونعاه ياسين عبر حسابه الرسمي على فيسبوك بكلمات مؤثرة :
اهداء لمجدي، كان المساعد بتاعي لأكتر من ١٤ سنة، قصته فيها كمية عِبر حياتية غير طبيعية.. اشتغل كهربائي لمدة تلاتين سنة وبعد كده حصتله حادثة موت اتكتبله فيها عمر جديد..ومن هنا ابتدا يشتغل مساعد ليا بناءًا علي نصيحة أبويا اللي رشحهولي عشان اخلاصه وأمانته.. عمره ما كان يتخيل انه يشتغل في السيما ويقابل روبي ومني زكي ومحمود حميدة!! ومش بس كده، ده كمان وقف قدام الكاميرا كذا مرة في أدوار شرفية..كل الناس حبته لأنه يخش القلب علي طول لطيبته وبساطته.
كان يخاف عليا جداً بالذات في مشاهد الاكشن..وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست.
اللذيذ في الموضوع انه كان ييجي يسألني عن نصيحتي في حاجات شخصية علي رغم فرق السن..مفيش طفل يشوفه غير ولازم يبتسم لا إرادياً بسبب وشه البشوش والطفولي.
مجدي رحل عن عالمنا من ٣ أسابيع ، ولحد النهاردة أنا ما اتكلمتش عنه. يمكن لأني بتجنب ده أو أني معتبره ماحصلش، مش عارف.. بس اللي عارفه كويس أوي أنه حقيقي واحشني، سلام يا ميجو ♥️ الفاتحة.
