بقلم: حليم اسكندر
حزين ع اللي بيحصل ف بلادي      بأرفع صوتي يارب وأنادي
تعال بمجدك خلص مصـــــــــــر     لأجل بلــــدنا ولأجل أولادي

عيني بتبكي يا بلــــدي عليكي      وبأطلب من ربنــــا يحميكي
ويمشيكي في سكة نصـــــــــر      وبمجده يبارك أراضيـــــكي

كنتي ف يوم للدنيا منــــــاره      بقيتي بتمشي لورا يا خساره
ودقتي يا مصر طعم الكســــر     وكم الظــــــــــلم ملانا مرارة

بنصلي ونرفع اياديـــــــــــنا      وبنطلب ربنا يحميــــــــــــــنا
ويبدد الظلمه بفجـــــــــــــــر      وبنوره يقتاد خطاويــــــــــــنا

بحبك يا بــــــــلادي يا أمي      و أنتي عايشه في نبضي ودمي
والكوخ فيكي بأشوفه قصر      ما أنتي الأم اللي بتحملي همي

بنحبك ولا يمـــــكن ننسي       انك ليــــــــــــــنا شط ومرسي
وها تبقي إلي ابد الدهــــر       الحضن اللي عمــره ما يقسي

بنحبـــك ولا يوم ننساكي        وأرواحنا ودمــــــــــانا فداكي
مصريين بنقولها بفخــــر       وقلوبنا تحـــــــــــبك عشقاكي