بصراحة

في برنامج شوية صراحة اللي بيجي على السات سفن .. كنت معدي مرة في الشقة وشفت بنت كانت بتتكلم إن هي السبب في إن الولاد يبصلها نظرات غريبة ويعاكسوها حسب لبسها وكأنها بتديهم العذر !

وبنت تانية تقول: رأي أهلي في لبسي هو اللي بيخليني أحدد إن كان صح ولا غلط .. وكان في ولدين واحد من هم قال المحزق والملزق والهجص ده .. والتاني أكد على موضوع المكان وارتباطه بنوعية اللبس والاستايل .. 

 

وجهات نظر كلها بتصب في حتة واحدة تقريبا 

 

 

بصراحة وشوية اكتر من الصراحة .. ده جعلني أشمئز .. 

الولد يلبس بادي ويبين عضلاته .. وسيقانه الجميلة بشعرها الغزير او القليل والكوتش الماركة .. والشراب الانكل .. والباشا يبين رجولته .. ويحط أكس وبرفيام هوجو تركيب الازازة ام خمسة جنيه .. ولبس حظاظة .. مفيش مشاكل وعادي مش مثير يعني مش سكسي ..!

 

البنت لو لبست بادي .. - وحياة الكيبورد - بادي عادي .. وسابت شعرها وحطت عطر وحطت شوية ميكاب ولبست غويشة او انسيال وسلسلة .. وخاتم وبنطلون سكين - اللي هو أساسًا كان معمول للبنات وبيلبسه ولاد عادي دلوقتي-، بتعبر عن إنوثتها .. بقى ده الحرام؟!؟  .. بقى ده السبب إنك يا قليل النضج تعاكس؟ وتقل ادبك وتلمس؟!؟ .. 
 

مين قال إن المجتمع دكر .. ما هي البلد نتاية .. مين قال إن الأدب دكر .. اللياقة نتاية ..

 

بلاش تزرعوا افكار هي غلط في غلط .. ومشكلة المرأة وحقوقها .. هي نفسها المرأة اللي بتضيعها ولو مش عارفة تاخدي حقوقك اسالي بس بلاش تتطبشي وحياتك .. بلاش ترجعينا لورا 

 

دي المنقبات بتتعاكس يا ناس .. المجتمع مريض وشاذ