ستات مصر مابتتجزؤش

بصراحة بهرتني حالة الغضب اللي نقحت على هوانم  المحروسة بعد  هرتلة المذيعة الكرتونية  بترويج شوية أفكار  كوميدية لذيذة  عن العلاقات الزوجية

  وعليهم  شوية انفعالات شتوية على  شعارات في الطراوة ، كلها كانت محط سخرية وضحك  من الرجال قبل الستات ..ومع ذلك قامت انتفاضة نسوية شيك  يؤيدها طبعا بعض  الرجال اللي بيطلق عليهم تنويرين .. وكلا وألف كلا  .. وإلا ستات مصر  ..لا للتحريض  ضد المرأة ..ولن نسمح .. واحنا مش جواري ولن نقبل الإهانة الشتوية  في تاريخ النضال النسوي العظيم .. وهوب ياسادة اتقدمت شكوى صارمة ضد المذيعة الباربي   لوقف أي تحريض ضد المصريات ..والإعلام  قام ماقعدش  ..كل دا  جميل جدا .

وتشاءالأقدار  الساخرة يامؤمنين  أن دا يحصل في نفس توقيت صدور  الحكم  الخطير  ببراءة المتهمين الثلاثة بتعرية  ست  صعيدية  في دور أمهم أو جدتهم على مرأي ومسمع الشارع كلة  وهي سيدة الكرم الشهيرة .. 

النهاردة  المتهمين دول  بحكم البراءة دا بيطلعوا لسانهم للدولة وللقانون  وللستات كلهم  

والسؤال  هي الست سعاد دي مش احدة ست والمفروض أن قضيتها  المحزونة تهم النسويات برضة  وتهز الرأي العام الشتوي برضه ولا ماوصلهمش الخبر ..

للأسف أيوه ..احنا بنتجزأ حسب الطبقة الاجتماعية وحسب الطائفية والشللية والعيلة و..

.احنا مصابين بجزام  السلفية اللي عشش جوانا وشوهنا تماما .فاللي بتقال على المنابر مالوش علاقة بالواقع نهائي خاصة وان القضية لسيدة قبطية والموقف حساس فنعمل نفسنا مش واخدين بالنا  ونركز أكتر مع بتاعة الصوت الشتوي 

وقامت حملة كلها منظرة ولن نسمح لست تقول ",يا....أستاذ ..محماااد" 

طيب أهو الأستاذ محمد وعم محمد  بذات نفسه  وبعيلته وتراثه ونسله كله عرى  ست  مصرية في قلب الشارع وعرانا كلنا .. فين الشرف اللي يغطي ؟