كتب: محرر أقباط متحدون
حاز مسلسل "بالطو" الذى يعرض المشاكل والمواقف التى يتعرض لها خريجى كلية الطب في سنة التكليف التى يقضونها في أماكن بعيدة، على إعجاب المشاهدين عامة والأطباء خاصة.
وعلق المخرج بيتر ميمى حيث أنه طبيب قد تعرض بالفعل لمثل هذه المواقف وكتب" اللى بيحصل فى المسلسل كان بيحصل زمان بالظبط
انا استلمت تكليف سنة ٢٠١٢ على اساس انى طبيب ثالث فى احدى الوحدات الصحية فى البدرشين
و للاسف الوحدة كان فيها تصدع فى المبنى و كنا فى اوضتين (حرفيا اوضتين) تبع الجمعية الشرعية
و للاسف الطبيب الثانى كان عنده امتحانات ماچستير و خد اجازة
و للأسف الطبيب الأول و مدير الوحدة كان زهق من الليلة كلها و راح مستشفى تانية
و للأسف بعد أسبوعين فى الوحدة لاقيت نفسى مدير الوحدة و مفتش الصحة و انا عندى ٢٤ سنة! و مش عارف منين يودى فين!
مفتيش الصحة مسئول عن المواليد و الوفيات و التطعيم و الطوارئ و الجراحة و الباطنة و الختم (و الختم و الختم ده اهم حاجة قالولى ده لو اتسرق منك هتتسجن)
كان بيعدى عليا حاجات غريبة مرة واحدة دخلت عليا قرصها عقرب و جايبة فى ايديها العقرب و يوم جالى واحدة مشربة بنتها اللى عندها اسبوعين لبن جاموسة و مرة روحت اعاين جثة و اطلع شهادة وفاة و الجنازة اكنك فى فيلم الهروب و مرة اتخانقت مع اهل مريض و الممرضة قالتلى متجيش بكرة علشان دول ناس صعبة ممكن يقتلوك !! و مرة حد ضرب حد بسكينة و اهله مسكونى ضربونى انا علشان مش لاقيين الواد اللى ضربه بالسكينة! ده انا اضربت ضرب مخدهوش جدى فى فيلم بوحة!
كل ده و عندى ٢٤ سنة!
كنت babyboy يعنى!
