1- قام حرس الدكتور مرسي وهم الحرس الجمهوري بضرب عجوز لأنه هتف ضد الدكتور مرسى ولذا قررت أن أهتف معه ومع كل المصريين ضد مرسي نكاية في الحرس الجمهوري الذي وقف عاجزاً أثناء الثورة لحماية رئيسهم مبارك والآن يتفتونون على عجوز لا حول له ولا قوة لكن العجوز هذا سيدعو عليهم وعلى من تركهم يفعلون فعلتهم، يادكتور اتقي دعوة المظلوم. صحيح أنا ما كنتِش فاهم هو ليه مرسي راح أسيوط ب12 ألف جندي، كنت فاكره رايح يحرر أسيوط من حد احتلها أو رايح يفتحها، لكن الآن فهمت هو رايح يضرب العجائز والمحتاجين، وسلم لي على وا مرساه.
 

2- دعى الرئيس مرسي جماهير الشعب الغفير أن يتبرعوا لمشروع النهضة، وأنا بصراحة ما فهمتِش هو مشروع النهضة ده يتيم مش لاقي أهل له يربوه، ما المشروع له الجماعة، والجماعة أهله وعشيرته ويتبرعوا له ويراعوه، ولو كان مشروع النهضة ده عاطل عن العمل الحكومة تشغله، ولو كان مشروع النهضة ده مش لاقي حد يلمه إحنا مالنا بيه، هو إحنا كنا فتحنا صدرنا وقلنا عندنا مشروع نهضة؟! إللي حضر العفريت يصرفه، وإن ما عرفش يصرفه يتحمل أذاه يادكتور. 
 

3- يدعو الرئيس شعبه أن يقوم بثورة ثانية ضد الفساد، يا عيني على الصبر، واضح إن الدكتور يده مغلولة يا جماعة، لا يقدر أن يحارب الفساد، في يده سلطة تنفيذية وأخرى تشريعية ومش عارف، ووزير العدل من رجاله طب نعمل له إيه أكتر من كده؟ وبيستغيث بالشعب، يا دكتورهو الاستعانة بالشعب لتنفيذ مشروع النهضة ومحاربة الفساد كانت من برنامجك الرئاسي!؟ يا دكتور لما اختارك نصف المنتخبين اختاروك لتنفيذ أحلام وليس لتطلب منهم المساعدة لتنفيذها. وبعدين تبرعات إيه إللي عايزها، ده لو بطلت زياراتك المكلفة الملايين لكانت مصر دولة عظمى، مش بأقول ما تزورشي، زور بس من غير الملايين التي تصرف لتزيين الأماكن الذاهب لها، والحراسة الزائدة عن الحد.
 

المختصر المفيد –كسر إيد إللي يمد إيده على مصري يطالب بالحق –تبرعوا لزيارات الرئيس، وسيبكم من مشروع النهضة –إللي مايقدرشي يحارب الفساد يستقيل.