محرر الأقباط متحدون
انتابت أسرة الفنان الراحل طلعت زكريا حالة من الغضب بعد ظهور فيديو نُفذ بتقنية الذكاء الاصطناعي يدعي أنه مات مقتولا، وهو على غير الحقيقة.
وفي مداخلة هاتفية ببرنامج مساء دي إم سي، علقت ابنة الفنان الراحل، وقالت: "الفيديو وصلني لما لقيت أكتر من حد على السوشيال ميديا بعتهولي لأنه موجود على "التيك توك" و "الفيسبوك"، أول ما شوفت الفيديو دخلت للصفحة دي وغصب عني كتبت تعليق وقولت إن الكلام ده مش صح ومش مظبوط، و"الأدمن" عملي بلوك عشان مبقاش حتى قادرة أكتب تعليق".
وأضافت: "روحت مديرية أمن الجيزة وتواصلت مع أحد الظباط هناك وبصراحة الناس متأخروش وابتدوا يهتموا بالموضوع وبالفعل حررت محضر وخدت رقمه وماشية في الإجراءات، هو الفيديو اتشال من على الفيسبوك بس لسه موجود على التيك توك"
واستكملت، مشيرة إلى أن هذا يعتبر حملة ممنهجة ضد الفن والفنانين المصريين على حد قولها، وقالت: "أدمن الصفحة قالي احنا بنعمل كده عشان الناس تترحم على طلعت زكريا، لا هو كده بيقول أي كلام، تترحم إيه؟ لازم نقول إنه مات مقتول؟ .. ومش هو بس أنا اتفرجت على كل الفيديوهات اللي على الصفحة دي، كل الفنانين هما مطلعينهم مقتولين.. أنا بشوف إن دي حملة ممنهجة ضد الفن والفنانين المصريين بالذات، يعني هو كل الفنانين ماتوا مقتولين؟ ماهي دي حاجة لا تعقل".
وعن تقديم ابنة الفنان الراحل سعيد صالح لبلاغ أيضا ضد نفس الصفحة، قائلة: "ولما عملت كده الأستاذة هند سعيد صالح اتقدمت ببلاغ لأنها لقت فيديو على نفس الصفحة دي للفنان سعيد صالح".
واختتمت حديثها، قائلة: "الفيديو بيلف يعني هو اتشال من على الفيسبوك بس لسه موجود على التيك توك و ده أثبته في بلاغ رسمي، لازم يكون في ردع للناس دي، دول عاملين فيديو لإبن الفنان حسن يوسف وفيديو للشعراوي".
ورحل عن عالمنا الفنان طلعت زكريا في 8 أكتوبر عام 2019، إثر تعرضه لأزمة صحية.
