ماجدة سيدهم
افرحي وتهللي جدا يابيت لحم ..انتي مش هاتفضلي الصغيرة ولا المحتقرة  بين كل اللي حواليكي اللي شايفاهم كبار وعظماء ..

عارف إنك  مرذولة  ومهملة في المزابل  وماعندكيش ثقة بنفسك وحاسة إنك  مزوية بعيد بلاقيمة والكل بيهملك ويتنمر عليكي لحد ماصدقتي من جواكي إنك فعلا حقيرة فماعدتيش بتتألمي ولاتشتكي  لأنك اتعودتي ..دا رأي الناس

بس أنا ليا رأي تاني وليا موقف مختلف تماما ..أنا اخترتك أنتي..أيوه أنتي بالذات .. أنا اللي بمشي كل يوم افتش كويس جدا في كل مكان وفي كل حتة عن التعبانين من جوه واللي شايفين نفسهم صغيرين  وفشلة أوي  وباسمع صوت البكا اللي من جوا  وببدأ من هنا ..دا زمن الحب

انا اللي بلم المكسر والفتافيت والملطخ وأشكله من جديد علشان يطلع بصورة تذهل الكل ..دا شغلي المستحيل "من الطالعة من البرية مستندة على  حبيبها "..
 أنا اللي بخرج من الجافي والمقرف حلاوة تبهر الكل .. وكل ضايع بلاقيه وكل منتهي ببدأ فيه.. وكل خسران بحمله مسؤلية عظيمة وكل خجول بظهره بثقة وقوة مجدي فيه..

 أنا اللي بنزل الأعزاء عن الكراسي وبرفع المتضعين ..أنا اللي اخترت تلاميذي ..شوية صيادين غلابة بكل عيبوهم  ومشاكلهم حتى مع بعض وقلة إيمانهم ..لكني اختارت اتولدت في كل القبح اللي جواهم وكمان هايدينوا العالم معايا تصوروا ..

 ماعنديش حد مالوش قيمة ولا عندي نفس مدغدغة  بتترمي ..أنا الفخاري الأعظم ..مش قولت لكم أنا رأي تاني ..

أنا الفرح ياكل واحد هو بيت لحم ..ففي ميلادي كل المقايسس بتختلف..

 ميلاد مجيد لكل بيت لحم اللي جوانا ..

"وانت يابيت لحم أرض يهوذا لست الصغري بين رؤساء يهوذا . فمنك يخرج مدبر شعبي اسرائيل "