لكن اكتشفت مؤخرا ابعاد جديدة للصراع ده وصراحة مش عارفة احدد موقفي

 

اكتشفت أن الاخوانية دي ديانة!!!!!! بعد ما صبحي صالح اكل علقة موت قال في تصريحاته وهو مربط وشكله يقطع القلب، اهئ ، اهئ ، اهئ

 

قال إيه صبحي صالح … قال اللهم امتني علي الاخوانية

 

وقبلها بيوم لما قامت جماعته بهجمتها علي المعتصمين السلميين عند الاتحادية …وتكسيرهم الخيام ونهبهم محتوياتها علي إنها غنائم بالإضافة لسرقة محل خمور وتلصيق تهمة شرب الخمور بالمعتصمين …!!!! لا و الكارثة كمان طلع في الديانة دي اكل الجبنة النستو حرام لأنهم لقيوا في الخيام إلي نهبوها جبنه نستو !!!؟

 

مع اني مع حرية المعتقد لاقصي درجة وما يفرقش معيا تطلع ديانات جديدة أو أي حاجة موضوع لا يهمني من بعيد بس صراحة اذبهليت من الديانة العجيبة دي تعالوا كدة نفندها

 

المفترض إن بعد الإسلام مافيش ديانات تانية واي حاجة تانية تعتبر فلسفة أو ديانة أرضية

 

طيب يبقي الاخوانية دي ديانة أرضية ولا إيه باضبط ..

 

نقع في مشكلة تانية ، الديانات الأرضية والفلسفات بشكل عام ترفض العنف ….. ومش بتكفر حد أساسا … طيب أزاي يعني كدة مش هينفع تطلع الاخوانية ديانة أرضية أو فلسفة

 

طيب نرجع للديانات السماوية

 

هنفترض إن الاخوانية ديانة سماوية … يا تري مين النبي بتاعها حسن البنا مثلا ولا سيد قطب ولا كارثة انه يكون النبي بتاعها بيتجدد مع كل مرشد يعني بدعدع دلوقتي هو النبي ده كان واقف علي منبر الأزهر يوم الجمعة وبيتنطط علي الشهدا “ضحايا العنف يوم الأربع الدامي ، العنف اللي الاخونية ابتدته”

 

طيب سبنا من موضوع الأرضية والسماوية والانبياء اصلي كدة مش فاهمة حاجة فمش هينفع اكتب حاجة أنا أصلا مش فاهمها

 

نرجع بقي لحاجة أهم من ماهية الديانة دي نرجع لتفاصيل فيها مهمة

 

الاخوانية بتسمح بالاعتداء وترويع الآمنين وسرقتهم وكمان اتهامهم بسرقة حاجات هم ماسرقوهاش ، كمان الديانة دي بتحرم اكل الجبنة النستو وجاري البحث إن كان كل أنواع الجبن محرمة ولا النستو بس

 

الديانة دي بتعبر إن أي حد لا يتبعها كافر حتى لو كان أصلا علي دين سيدنا محمد (ص)، والعجيب انهم بيدعوا انهم مسلمين …..ودي نقطة محيرة جدا جدا يعني هل هم اكتشفوا مثلا اكتشاف ماحدش غيرهم اكتشفه  وكان تايه عن ملايين المسلمين أو … يجوز يكون ربنا هيدخلنا الجنة بكرنيهات العضوية بتاعتهم واللي مش معاه العضوية هيدخل  النار !!!!!!!!!

 

بجد مش هاقدر افهم أبدا الناس دي و لا ديانتهم المفبركة والمخترعة ولا هي ديانة سماوية ولا حتى ديانة أرضية أو فلسفة وبجد بجد اعوذ بالله من غضب الله

 

تنطبق عليهم الأيات الكريمة

 

وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ (11) أَلا إِنَّهُمْ هُمُ الْمُفْسِدُونَ وَلَـكِن لاَّ يَشْعُرُونَ (12) وَإِذَا قِيلَ لَهُمْ آمِنُواْ كَمَا آمَنَ النَّاسُ قَالُواْ أَنُؤْمِنُ كَمَا آمَنَ السُّفَهَاء أَلا إِنَّهُمْ هُمُ السُّفَهَاء وَلَـكِن لاَّ يَعْلَمُونَ (13) سورة البقرة

 

أما عن الناس اللي معجبة بيهم وفاكره انهم فعلا مسلمين احب أقول لهم  

 

قال تعالي : وَمِنَ النَّاسِ مَن يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللّهَ عَلَى مَا فِي قَلْبِهِ وَهُوَ أَلَدُّ الْخِصَامِ(204)وَإِذَا تَوَلَّى سَعَى فِي الأَرْضِ لِيُفْسِدَ فِيِهَا وَيُهْلِكَ الْحَرْثَ وَالنَّسْلَ وَاللّهُ لاَ يُحِبُّ الفَسَادَ(205)  سورة البقرة