سيادة الرئيس الدكتور محمد مرسي، بعدما جلست مع نفسي، وراجعت هجومي عليك وعلى أفعال جماعتك، اكتشفت أنني كنت باغياً مجحفاً، ولم أجد لنفسي حقاً فيما أدعيه عليكم من أنكم سفاحين أو فشلة أو نهازين أو ديكتاتوريين أو لا تعترفون بالقانون، كل هذا غير صحيح، ولا مانع من أن يعود الإنسان لرشده وللصواب، والحق مافيش أحسن منه. 
 

إحنا كنا فين؟ وبقينا فين؟ إحنا كنا زمان بنتعذب في المتداري، دلوقتي بقينا نتعذب على المتداري وأدام الكاميرات، زمان كنا بنبيع البلد بالقطاعي بعد قانون الصكوك الجديد يا دكترة بنبيعها بالجملة، خلينا نخلص بقى بلاش وجع دماغ، إنت عايز تريحنا من تقطيع القلب وإحنا بنشوف البلد بتتباع فبتبعها حتة واحدة، وبعدين إنت بتبعها لمين؟ ما إنت حاتبعها لقطر دولة شقيقة وصديقة، والله ما لينا حق، وإسرائيل وماله، دول ناس طيبين ومنهم أصدقاء لفخامتك، وأمريكا مالها أمريكا يعني ناس كُمَّل وهما إللي ضغطوا لغاية ما جابوك واختاروك لينا، وكان نِعمَ الاختيار، مش أحسن من الأول لما كنا بنبعها لمستثمرين خايبانين، ويعملوا لنا مشاكل، وبعدين إيه يعني لما تقتل متظاهرين، ما كلنا عارفين إن مسألة الزيادة السكانية مؤرقة لكل الحكومات إللي حكمتنا، وهو حد ينسى إللي كان بيقوله  مبارك معايراً لنا على زيادة النسل،هو يعنى إنت عملت حاجة ما عملهاش مبارك،ابدا هو قتل وحضرتك قتلت، إشمعنى إنت بقى إللي واقفين لك على الواحدة، هو صحيح مبارك سجناه بس مبارك كان يستاهل، كان راجل فاسد كان بايع البلد لشلته، لكن حضرتك بتمكن جماعتك من كل مفاصلها، والفرق كبير بين شلة مبارك وجماعة حضرتك، الله يبارك لك فيها ويبارك لهم فيك، ما بخلتش على حد منهم بحاجة ،كل واحد منهم معتبر أو مش معتبر وليته منصب، إيه الكرم ده؟ ما بين مستشار لحضرتك، لمحافظ، لوزير، لرئيس وزراء، لرئيس مركز أو مدينة، الصراحة حضرتك في منتهى الكرم، كفاية إنك قاعد تسمع شتيمتك بنفسك وإنت مالكش ذنب في حاجة من دي، والمرشد هو إللي بيبقى عامل العملة وسايبك متصدر فيها، يا عيني عليك يا دكتور مرسي. وإللي يغيظك إنها زي ما حضرتك شفت عمايل حلوة، ما يتلامش عليها رئيس دولة مؤمن تقي زي جنابك .
 

فخامتك لما بتسفك الدماء، بتسطر تاريخ لا يمحى بدماء المصريين يتذكره الجميع، كيف أمنت كرسيك؟ العيال يذاكروا أيه في التاريخ؟ لو حضرتك ما ملأتلهمش كتب التاريخ بوقائع زي إللي بتحصل دي، وبعدين إيه يعني حبة دم، ما الدم المصري ده مرطرط في كل حتة، وبعدين يعني حضرتك كنت قتلت ناس ليها قيمة؟ إيه يعني زهرة شباب مصر المفكرين والمبدعين مفجري الثورات، إللي مافيش ضفرهم في جماعتكم الفاشلة الغبية الحمقى الفاشية الدموية، لامؤاخذة الصفات الأخيرة دي ما تعيبشي جماعة جنابك ولا تسيء ليها، ده شرف ليها إنها تكون كده، فالفاشية والدموية مطلوبة لشعب زي شعبنا ناكر للجميل، والغباوة والحماقة شيء نادر في شعب زي الشعب المصري، والندرة تُوجد القيمة، ولذا أنتم ليكم قيمة، لكن لما إحنا بنفهمكم ونكشف كذبكم، إكمننا بنفهم مش زي خرفانكم إللي بيصدقوا كذبكم، ولو كان مش مترتب دول ناس خسارة فينا، هما الحقيقة مش دول بس إللي خسارة فينا يا دكتور مرسي، إنما أنتم كلكم بخرفانكم بقياداتكم خسارة فينا، أقول لك يا دكتور، ما تاخدوا بعضكم وتروحوا على غزة سيبكم مننا، إحنا شعب قليل الأصل ما بيطمرشي فيه، وما يستاهلكمش، أبوس دماغك يا راجل، خد جماعتك وارحلوا سيبوكم مننا، إحنا لانستاهل مشروع نهضتكم، حلال على حماس أو على السودان أو أفغانستان، أقول لكم حلال على الأمريكان، مش هما إللي اختاروك، روحوا لهم دول ناس طيبين خالص  وأمراء، وعلى الأقل تبقوا واخدين دولة جاهزة بسلاحها بصواريخها، وأسلحة تدميرها، تسودوا بها العالم، يالا يا دكتور خد بعضك وعدي على المرشد وخد معك الشاطر، وربنا معاكم مع السلامة، والقلب داعي لكم، وما تقوليش داعي لكم بإيه؟ لكن ربنا ياخد من قلبي ويسر، ربنا يوريكم في عيالكم إللي وريتوه لنا، ربنا يديكم على أد نيتكم فينا،يارب يقعد لكم كل إللي عملتوه فينا، يا رب إنتم ناس ولاد حلال وتستاهلوا كل خير، ارحلوا بس، وسيبوا البلد وربنا يتولانا، أقول  لك خد وإنت ماشي السلفيين بالمرة يمكن ينفعوكم في مليونات تعملوها في أي حتة رايحينها، أهم ناس زي العسل راخرين ما يتخيروش عنكم، قتل ودم وسحل وشتايم وبذاءات وحاجة فُل، يعني تعملوا مع بعض أحلى شغل.
 

المختصر المفيد لو جابوا للديكتاتور ميت عقل على عقله مش حايعجبه غير عقله.