- عزيزى المتآمر الواطى الوضيع.. إذا أردت أن تمحق دولة لها تاريخ وجغرافيا وحساب مثلثات فعليك باتباع الخطوات التالية:

- اصطادها على إثر تخلصها من حكم مهترئ شكله جامد من بره ومهورب من جوه..

- المؤهلات.. كورس متقدم فى فن الحنجورى مدعوم بخلطة سياسة مضروبة من كُتّاب الشيخ بلاميطة، بالإضافة إلى دبلوما فى ضرب القوانين المخوخة والقرارات الكفتة..

 

- أول حاجة تعملها تلبس الملابس المناسبة وانت بتخطط للدنيئة.. اضرب دقن.. اخبط زبيبة.. البس ملابس مناسبة للتغريب لا تنتمى لأى ثقافة خاصة ببلدك، زى الجلابية الباكستانى والسروال الهندى والمركوب الأفغانى.. والطع طاقية على نافوخك أو شال أو عمة أو فاروقية وإن غلب حمارك انكش شعرك وسيبه منتشر فى كل اتجاهات البوصلة اللهم إلا إذا كنت أقرع.. يعنى اطلع بهوية كوكتيل كده مالهاش أصل عشان الناس تنسى شكل الأزياء المرتبطة بالبلد عامة.. فيتوهوا وينسوا هما جايين من أنهى مصيبة أصلاً.. ثم ارفع شعاراً دينياً مستغلاً العبارة المتوارثة «شعب متدين بالفطرة» حتى لو اتضح بعد كده إنها مقولة أى كلام.. وخوف الناس من عقاب ربنا عالبلاوى اللى بيرتكبوها ليل نهار وهما بيعانوا من حالة التناقض الرهيبة التى يعيشونها.. بل بالغ أنت أيضاً فى صنع هذا التناقض فارتكب حاجات عِكس عِكاس كلها حتى يشعروا إن مدام بتوع الدين بيعملوا كده فعادى يعنى.. قشطة.. وأيضاً استغلالاً لالتزام البعض فعلاً بالعقيدة التى سترفع أنت شعارها رغم إنك فياسكو ومتدين كده وكده..

 

 ضع يدك على الجوامع فمن هناك ستبدأ فى نشر الفتنة وذلك بضخ أسراب أو قطعان من الدعاة.. مش مهم يكونوا دعاة بجد.. فمع توحيد الزى الهلامى ده كله حايتدارى.. عندك كمية من الأنفار تقدر تجيبهم من خريجى المعاهد الفنية أو العمال العاطلين عن المهارة والعمل ودول بالكوم.. حفظهم شوية آيات وتفاسير بمفهومك إنت مهما كان معوجاً.. وأطلقهم فى الزوايا والجوامع المتدارية وابقى افتحلهم شوية صناديق نذور يقلبوا منها عيشهم.. اجعل مهمتهم الأولى هى تكفير الأقباط، ثم تكفير أى حد لن يتبع طريقك وينضم لقطيعك..

 

- حط قدامك خريطة المنطقة التى تنوى نسفها مبينا بها مناطق الرزق والتنوير.. فى حالة بلد زى مصر سترى أنها بلد كبيرة وناسها كتار قوى.. إذن نبدأ بإفقارهم وكسر عزتهم وتفتيت وحدتهم.. مبدئياً اقتل كل منبع للرزق أو والعياذ بالله الثراء.. مع الحرص الشديد على الاحتفاظ لنفسك بمنابع لا تجف من التمويل والتقليب لحسن تجوع زيهم وتفقد الكونترول.. إضرب مصدر الدخل الأول، وهو السياحة، فى مقتل وذلك بإطلاق مجموعة من أبواقك لإلقاء تصاريح مكفرة ومرعبة للفكرة نفسها، واضربلك تفجيرين تلاتة فى كام موقع سياحى.. ثم إوجد لدى البعض المحدود من العاملين بها فكرة أنهم يمارسون مهنة حراماً عشان بيشوفوا لحمة السواح عشان يتهدوا ومايعملوش أذعرينة.. هكذا يتم قتل هذا المورد بأقل مجهود.. وإسقاط البلد من قوائم الدول السياحية الآمنة عالمياً وحلّنى على بال ما يبقوا يقوموها.. تمام.. كده تم تشريد اربعتاشر مليون نفس.. الخطوة التالية..

 

- اقتل الثقافة والتاريخ والآثار.. ادبحلهم أى مصدر للرزق من هذه الأنشطة التى تقترن أهميتها بالزهو والخيلاء والتفوق أيضاً.. اجعلهم يفقدون مناطق التميز التى كانت تجعل بلدهم تتزعم المنطقة وتتواصل معها وتنير لها الطريق.. اقتل حرية الرأى عن طريق الإعلاميين أو حاول حيث إن هذه مهمة ستبدو صعبة لعنادهم المستميت.. واخلق إعلاماً موازياً حتى لو طلع عبيط وكذاب ودم أمه بيض بريشت.. انشئ كام قناة دعوية فاشلة مستعيناً بالتمويل الخارجى المغرض واصدر كام صحيفة وموقع إليكترونى ينفثوا السم ليل نهار.. صحيح إنك محروم من أى إبداع لكن مش مهم.. المهم هو تجميع رؤوس الخلايا الصاحية والنايمة لتتواصل معها من غير ماتتقفش..

 

- خللى قناة السويس على جنب شوية أما نشوف حانقلب عيشنا منها إزاى.. بس ولع فى مصادر الطاقة بكل أنواعها أو هربها عن طريق أنفاق فاتحة عدل فى حجر الشركاء من الخارج.. وابقى خد حسابك م الناحية التانية..

- إرهب العاملين بالخارج بحيث يمنعوا تحويل أموالهم للداخل وبالذات المسيحيين ولاد الكلب دول.. هدد أمن السبعتاشر مليون مسيحى داخل البلد وفهمهم إنهم لا سبعتاشر ولا حاجة دول مايكملوش خمسة مليون، فيشعرون بالدونية والرعب ويتم نزع الإحساس بالمواطنة تماماً منهم.. فيخرسوا وينبطوا ومايفكروش حتى يبقى ليهم صوت ولا كتلة ولا نيلة.. ياكش يهاجروا كلهم ونخلص..

 

- اقضى عالزراعة اللى كان مقضى عليها أصلاً.. ودور وشك وطنش على محاولات التبوير والتجريف والبنا عالأراضى الزراعية.. إحوج الفلاح لدرجة إنه يشحت منك الزيت والسكر والرز بدل ما يزرعهم.. اغلق المصانع وركز على التصدير والاستيراد.. بحيث يبقى التصدير لكل منتج مصرى قبل ما يكفى أهل البلد أو يتصنع الخام منه.. واستورد الحيوى من المواد عشان يفضل بق المواطن فى كف المستورد ويخضع لأى لعب من اللى بتلعبه فى سعر العملة غصب عن عين أهله.. مرمط بسمعة البلد الأرض على الصعيد الخارجى الدولى، بحيث ينزل تقييمها كدولة إلى الدرجات الدنيا، وبذلك تقضى على أهميتها الاستراتيجية وتلغمط على أهمية موقعها الجغرافى على الخريطة..

 

- احرص على نزع فتيل الأمان فى كل الأحوال والأوقات.. واحبط أى محاولة للشرطة للانضمام إلى صف الناس بل وعن طريق وزير من رجالتك اخضعها لك.. ستواجه مصاعب من الضباط الوطنيين.. لا تهتز وطعّمهم بعيال من بتوعك قال يعنى شرطة شعبية.. شوية شوية يتم الإحلال والتبديل وتحتل ميليشياتك هذا الموقع الحيوى.. ملحوظة.. عجّل بهذا الإجراء قبل ما يقلبوا عليك لإن شكلهم كده حايعملوها قريب..

 

- افتح الوينج الشرقى بتاعها لكل من هب ودب.. وبكده تستضيف حلفاءك وتقلبها مزرعة تسمين وتسليح وتدريب للجيش أبو جلابية البديل اللى بتحضّره لاحتلالها بالكامل.. اجمع كام نفر من مجانين الشهرة وملتاثى الزعامة، سواء باستدعائهم من الدول التى سبق تصديرهم لها فى مهمات جهادية أو الإفراج عن شوية مساجين من رجالتك حتى لو كانوا تجار مخدرات أو أمهم أمريكية.. أهم ينفعوا برضه.. واديهم وعود بأن أحلام مراهقتهم قابلة للتحقيق واترك لهم العنان لتكوين ميليشيات ينزلوا بيها الشارع يخوفوا الناس ويهددوهم فى أمنهم ومسّكهم شوية سيوف وخناجر فتثير الذعر وتحبط جين الشجاعة.. لكن احرص على إن زى ما فى إيديهم سيوف مشهرة فى وجه المواطن لازم يكون سيفك مغزوز فى رقبتهم، تمهيداً للغدر بهم فى أى لحظة.. طبعك والا حاتشتريه؟.. انشر رجالك اللى كنت منيمهم فى الدرة وقانيهم فى الخباثة، بحيث يحتلوا كل موقع فى الأجهزة التنفيذية والمحليات عشان تمسك البلد من خناقها وقت الحاجة.. وهوب هوب اعمل الانتخابات بسرعة انشا لله تجيب تماثيل عجوة تقعدها فى المجلس..

 

- هين نساءها.. غطى وشوشهم واكتم صوتهم واتهجم عليهم واتحرش بيهم واغتصبهم ومرمط بكرامتهم الأرض.. دول شر مستطير ولو ركزوا حياكلوك صاحى..

 

- جفف المنابع واطفى النور وعتم البلد.. إلهيهم فى أزمات عيشهم اليومى.. ذل الناس واقهرهم.. تخن فى جلدك وصم ودنك وتحلى بالتناحة اللانهائية والبلاطة والرخامة والزناخة.. سيب المعارضة تهوهو لحد ما يتفك البلف ويفضى الهوا كله من رئتها.. لاعبهم لعبة الإجهاد مسيرهم عضلهم حايخدل ويهرموا..

 

- دلدل رقبتك واتنيها للقوى الكبيرة الكارهة للبلد.. بس العواقب ما اضمنهالكش.. شكلهم حايمصمصوا عضمك ويرموك للغربان بعد كده.. انت مش أجدع م اللى اترمى فى البحر جثة هامدة..

- يفضلك مصيبة واحدة اسمها الجيش.. حطيتها فى جيبك ادخل أنتخ على سريرك وحط رجل على رجل وصفر لحن أركب الحنطور واتحنطر.. ماعرفتش.. وغالباً مش حاتعرف.. قول على روحك يا رحمن يا رحيم.. وأنا بقول تقوم تروح من دلوقتى.. شكلك حاتتعمل معاك الجلاشة اللى أنا مش عارفة هى إيه لحد دلوقتى..

 

- طق طق طق.. تزييق باب.. الأستاذ أنسى ساويرس وأبناؤك؟؟.. أيوه، نعم.. أحب أبلغك بمنتهى اللذة والنشوة وأنا ألعق الدم اللى مشرشب من أنيابى إنه صدر قرار بمنعك م السفر.. السفر منين؟؟.. من مصر حضرتك.. مانا برّه مصر يابنى.. طب حاهبدك بالتقيلة إنت محطوط على قوائم ترقب الوصول.. الوصول لفين؟؟.. لمصر حضرتك.. مانا مش راجع يابنى.. أنا قاعد هنا مع بيل جيتس بنعمل شغل على ميه بيضا.. عايز تهبدنى بحاجة تانية؟؟.. لأ أنا اتكبست.. طب بالسلامة قبل ما أهبد الباب فى خلقتك.. إممم.. طب ممكن حتة ببريزة عشان التاكس؟؟

 

zahqanin@gmail.com