بقلم : مرقص كمال زاخر
شوارع مصر أتعودت ترتوي بدم الشهيد
ومسئولين ساكتين يوماتى وكأنه دة دم العبيد
وكلام كتير بنسمعه عن سلام وعن نسيج
قول مواطنه قول حقوق قول كمان قول وعيد
الحكاية مش خناقة وفجأة كبرت يا كرام
الحكاية في القلوب غل أتزرع بدل السلام
ناس فارضين ع الناس وصاية بالدراع وبالسلاح
والمستخبى اهو ظهر بيسنده حكم ونظام
غنوا يا مسئولين وزيدوا ف حب مصر وانشدوا
علوا الهتاف قولوا مؤامره وصدقوها ورددوا
زى النعامة دافنين رؤوسكوا في التراب وخايبنين
بكره لما الدور هييجى عليكوا ابقوا عددوا
الدم هو الدم حتى لو اللى مات مبيشبهكش
هو اخوك فى الانسانيه دينه ولونه ميهمكش
كلام كتير عن الايمان ياما سمعنا وياما قلت
وريني إيمانك بعملك كلام وبس مصدقكش
كتب التاريخ فيها عبر بس اللى يفهم يستفيد
حكموك يا مصر كتير حتى المماليك والعبيد
وفى النهاية فضلت أنت وكلهم راحوا انتهوا
انهارده اللى ضربك يبقى فى التاريخ بليد
مصر شبعت حب وهمي بالكلام وبالغنى
مصر عاوزه ضمير بجد وقانون يقول نحن هنا
عاوزه قلوب نقية تصرخ نجينا وارحمنا يارب
انت سامع أنت شايف انت موجود وسطنا
ورغم أن الصورة سودا لسه برضو فيه أمل
طول ما لسه في نسمة من إرادة ومن عمل
مانا لو يئست هبقى ميت حتى لو كان شكلي حي
بكره شمسك يا مصر تشرق وكفاح ولأدك يكتمل