أنا لا أصدق ما ادعاه الشاطر بأن ليس هناك مشروع نهضة فالرئيس قالها في السودان، بأن مصر نهضت، وبالنظر لحال مصر وتأمل الحال التي وصلتها ، تستطيع أن تفهم ماهية مشروع النهضة التي نهضتها مصر، وهي أن تخرب مصر، ويقعد الإخوان على تلها، ومن وحي فهمنا لفكر مشروع النهضة التي نهضتها مصر وقال عنها مرسي، أتقدم لحضراتكم ببعض المشاريع التي استوحيتها من مشروع النهضة الإخواني، وقبل أن أكتب  لك تلك المشاريع أستحلف كل إخواني قاعد على النت ألا يأخذ تلك المشاريع ويقدمها لقياداته لألا يصدقونها، وينفذونها وخصوصاً إن عندهم ميول تخريبية وتدميرية وما بيصدقوا يهيصوا.

المشروع الأول: هو تجفيف نهر النيل تماماً من الماء وهذا سيعود علينا بفائدة أننا لن نعد محتاجين للكباري مما يعني أننا سنأخذ الكباري ونستفيد بحديدها ومواد بنائها ونبيعها أو نعيد تدويرها لأنه سيكون من السهل عبور النهر، كما أننا لن نحتاج لنصطاد فالسمك سيكون أمامنا نمد إيدينا ناخده، وكمان حايبقى عندنا مساحة كبيرة من الأرض الصالحة للزراعة، وما تسالنيش نزرع بأيه لما مافيش مية؟ لإني حاقول لك ويعني هو إحنا حانصطاد السمك إزاي؟ ما حايكون مات من غير مية ولو سألتني حاننشف الميه إزاي؟ حاقول لك ما الإخوان ممكن يكدروا جبهة الإنقاذ ويكلفوهم بتجفيف النهر، وآهم يلهوهم عن نشاطات الإخوان الجهنمية.
 

المشروع الثاني: تجفيف البحرين الأحمر والمتوسط، مما يعني أننا سنكون منفتحين على العالم يعني أي حد ينزل يتمشى من إسكندرية يلاقي نفسه في إيطاليا على طول، وده طبعاً حيدينا نفس الفايدة إللي حاتعود علينا من تجفيف النهر، وهي سهولة الوصول للسمك، كمان حانطلع بقى رملة كتيرة ممكن نبيعها، وشوف بقى إيه ممكن نلاقيه تحت اعماق البحر من مدن قديمة وسفن غرقانة، ونوسع الأراضي ونبني عشان الناس تسكن والشباب يهيصوا، وكمان في البحر الأحمر لما تنشفه حاتبقى الشعب المرجانية واضحة ومش محتاج نغطس، والسياحة تزيد، والله يكرمك ما تقوليش الشعب المرجانية حاتبوظ، لإني حارد عليك نفس الرد إللي رديته عليك لما سالتني عن الزراعة في المشروع الأول، فسأقول لك يعني هو السمك البحري هو إللي حايبقى عايش ويسهل اصطيادهّ، آهو كله مشاريع مستوحاة من الفكر الإخواني للنهضة اللي نهضتها مصر.
 

المشروع الثالث- ولا أظنه الأخير فسأوليكم بالمشاريع الجديدة متى طرأت علي أفكار جديدة- هو هدم الجبال بتاعة البحر الأحمر وجبال سيناء وبيع أحجارها،  وطبعاً إللي حاينشف البحرين والنهر هما برضه إللي حيكسروا ويهدوا جبال سيناء والبحر الأحمر إللي هما جبهة الإنقاذ، من باب إلهائهم عن الإخوان، وتكديرهم في نفس الوقت، كمان ممكن نبعتهم يحفروا في بحر الرمال الأعظم في جنوب غرب مصر، ونبيع الرملة دي ونوسع الحدود مع ليبيا والسودان، وتبقى هيصة بقى، ولو إن المشروع ده ممكن استبعاد جبال سيناء منه، خوفاً إننا لو هدمناها نكون هدمنا مأوى الجناح العسكري للإخوان الحامي له والذى تفاوضت معه مؤسسة الرئاسة بعد قتل جنودنا بسيناء، وتفجير خطوط الغاز التي توقف تفجيرها منذ وصول الإخوان للسلطة.
 

عزيزي القارئ، لا تنسى هذه مشاريع من وحي المشاريع الإخوانية، ونهضتهم لمصر التي أكدها مرسي، وأستحلفك ألا تزعل مني لو أخذها الإخوان بجدية ونفذوها خصوصاً إنهم بيتلككوا عشان يخربوا البلد.
 

المختصر المفيد الإخوان: خلاص خربنا مصر.