نادر شكرى
حالة من الجدل على مواقع التواصل الاجتماعى بعد واقعة احالة 5 معلمين للنيابة بعد نشر لهم فيديو تقوم احدى المعلمات بالرقص ومعها معلمين اثناء رحلة نيلية للقاهرة ضمن برنامج تم اعداده من قبل نقابة المعلمين فى نشاط خارج العمل .
انقسم الامر لفريقين ما بين مؤيد لقرار الاحالة لان ما حدث تجاوز من قبل معلمين هم قدوة وما بين رافض للاحالة لان ما حدث خارج نطاق العمل ويقع فى اطار الحياة الشخصية اثناء رحلة ترفيهية ، وان الرقص ليس حرام وان هذا يحدث فى اى مناسبة والجميع يرقص سواء فى افراح او رحلات ، وان الذى يستحق العقاب هو من قام بتصوير الفيديو ونشره لانه قام بانتهاك الحياة الشخصية
وفى هذا الصدد خرجت المعلمة المتهمة بالرقص عن صمتها، وتحدثت خلال بث مباشر على مواقع التواصل الاجتماعي، وقالت: «منه لله اللي صورني، دا خرب بيتي وجاب لي اكتئاب، وجاب لعيالي اكتئاب..كل ما حد من عيالي يشوف الفيديو يقولولي فيه إيه يا ماما، تسبب الفيديو في مشاكل لي وفي بيتي وأهلي وأسرتي».
وتابعت: حصلت مشاكل بيني وبين زوجي، أنا مكنتش أعرف أني بتصور، ولو كنت أعرف أن فيه حد بيصور أكيد كنت رفضت.. الموضوع كان مع زملاء في حفلة نيلية، وكان ترفيه وبنفك عن الكبت..أنا بأخذ 24 حصة في الأسبوع ومكبوتة جدا..يعني هو حرام الواحد يفك عن نفسه شوية؟».
وأضافت: «أنا في الحفلة النيلية كان لبسي عادي جدا.. ملبستش حاجة تعمل ضجة يعني دي رحلة في وسط الناس ووسط أهلي، وأنا بتواجد مع زملائي في العمل أكتر من وجودي مع أهلي في البيت».
واستكملت المعلمة حديثها قائلة: «اللي عمل كده فيا هسيبه للقضاء هو اللي يحاكمه عشان هو شوه سمعتي وسمعه عيالي.. هعمل فيه كتير.. بس أعرفه بس، وأنا مانعة تدخل أي حد معايا في الموضوع ده عشان الاكتئاب اللي عندي، وعلى فكرة محدش حولني للتحقيق أنا ماضية على تنازل إني مكملش في التعليم».
