كتب - محرر الاقباط متحدون
ينعي المهندس طارق النبراوي، نقيب المهندسين، بكل الحزن والأسى الإبن المهندس فادي نبيل ميخائيل، الذي وافته المنية إثر حادث أليم أثناء أداء مهام عمله في أحد المواقع بالقاهرة، وخالص العزاء لأسرته وذويه.
مضيفا في بيان :" وجاري اتخاذ الإجراءات اللازمة لضمان عدم ضياع حقوقه، وبينها توجيه لجنة المساندة القانونية بسرعة التعامل مع الحادث الأليم وملابساته، والبدء في اتخاذ كافة الإجراءات القانونية لحماية حقوقه، وكذلك توجيه لجنة السلامة والصحة المهنية بالتحقيق في الواقعة المذكورة، مع مراجعة إجراءات الصحة والسلامة المهنية في هذا المشروع.
وقالت صفحة "الشركات والمكاتب الهندسية" ان ثمة جريمة قتل حدثت بمنطقة التجمع الخامس بالقاهرة، حيث اقدم سائق لودر على قتل المهندس فادي نبيل.
وجاء بنص منشور الصفحة :"
والله العظيم كدة كتير اللي بيحصل ف المهندسين كل يوم مننا واحد يموت عمد او اهمال Share بعد اذنك عشان يجي حقه تم نقلها إلينا ع لسان زمايله ف الموقع من خلال رسايل الصفحة.
واحنا المهندسين بنطالب النيابة التحقيق ف الواقعة وسؤال الشهود محتاجين نعرف ايه حقيقة ماحدث لزميلنا ومراجعة كاميرات الموقع ومحاسبة الشركة اللي معينة سواقين مش ف وعيهم ومحاسبة السائق امبارح يموت ف بيارة بسبب الاهمال والنهاردة مهندس يتقتل ع ايد عامل.
شهادة زمايله /يافندم النهارده حصل كارثه بكل المقاييس انا مهندس شغال في شركه مقاولات شايله شغل من سوديك اسمها شركه بيرفكت في كمبوند سوديك فيليت بالتجمع الخامس النهارده حصل جريمه قتل متعمده لمهندس زميلنا في الموقع ايوه زي ما بقول لحضرتك كده وتقدر تتأكد من كلامي ده.
الجريمه حصلت إن سواق لودر شغال تبع شركتنا اللي هي بيرفكت لقيناه أثناء مرور مهندس فادي زميلنا مهندس المعماري بالموقع وتوجيه بعض التعليمات ليه أنه قام برفعه من علي الارض بكبشه الحفار ثم ألقاه من أعلي علي الارض ونزل عليه بكبشه الحفار مرتين علي دماغه لحد ما كل جزء من جسمه جاب دم بكميات مهوله.
اللي تم إن الإسعاف جت بعد أكثر من نصف ساعه وللاسف نتيجه لان الموقع غير منظم وبه بواقي اسياخ حديد في كل مكان فماكان إلا أن كوتش عربيه الإسعاف انقطع و تعطلت بالموقع أكثر من نصف ساعه أخري بعد وصولها .
لما العربيه وصلت رجال الإسعاف قالوا إن في نبض بسيط جدااا ولكن نتيجه الإهمال من شركه سوديك فارق المهندس الحياه وفاضت روحه الي بارؤها.
والشي المستفز أكثر أن ييجي شخص مريض والله اقل ما يقال عنه أنه مريض وبالمناسبه ده مهندس ماسك منصب في سوديك ويزعق للناس اللي كانت ملمومه لتحاول تكلم طقم الإسعاف أنه لو ممكن يتنقل بسياره مالاكي بعد وضع جهاز التنفس بها أو اي شي المهم يلحقوا المهندس لكن هذا المريض يزعق ويقولهم ابعدوا العملاء اللي جايه تشتري الشقق لو شافوكوا كده هيخافوا ومش هيشتروا .
تخيل ياصديق روح إنسان مهندس في ريعان الشباب اهلوا صرفوا عليه دم قلبهم ارخص من ثمن شقه عند سوديك تلك الشركه الظالمة بمهندسيها الظلمة طبعا بعد كده جت الشرطه وسواق الحفار ده خدوه وطبعا السواق ده قصه ثانيه خالص .
مره يقولك انا عملت كده اصلي عليا عفريت ومره يقولك اصل مهندس فادي مسيحي وانا عندي مشاكل مع المسيحين والظاهر طبعا أنه بيحاول ينفد من جريمته بس طبعا الواقعه كانت قدام الناس كلها .
واكيد طبعا واحد زي ده بيتعاطي حاجه ليه شركه زي سوديك متعملش أو تجبر الشركات اللي شايله شغل منها أنها تعمل تحليل مخدرات مثلا للناس اللي عندها.
ارجو رفع رسالتي ضروري عشان حقه يرجع وبرده هبعت لحضرتك صوره المهندس المقتول ولينك حسابه علي الفيس بوك.
