أبو العريف

رفع واحد من المحامين يافطة مكتوب عليها "التقاضي بالدستور مش بفاتورة زي النور"، وفضل يلف وهو شايلها ومعاه مجموعة من المحامين حوالين نقابة المحامين ونقابة الصحفيين ونادي القضاة، عمالين يهتفوا من قلبهم يا ولداه يمكن مجلس الشعب يحن عليهم ويلغي حكاية زيادة الرسوم القضائية الجديدة.

طبعاً الموضوع دة معداش من غير الواد شحتة أبو العريف صاحب كشك السجاير اللي على ناصية شارع عبد الخالق ثروت من ناحية شارع رمسيس، واسمه أبو العريف لأنه بيفتي في كل حاجة وكأنه عالم ذرة وكمان الكشك بتاعه مهم جداً لأنه مركز تجمع المحاميين والصحفيين وعدد من سكان الشارع يقعدوا يفتوا في كل حاجة سواء كانت سياسة أو اقتصاد أو رياضة وغيره وكأنهم خبراء من وزارة الأزمة.

شحتة غمز لي وأنا واقف بشرب حاجة ساقعة عنده وقال: يا أستاذ أنا خايف الحكومة تضيف لفاتورة القضية رسوم زبالة، وخبط بأيده الشمال على الكونتر بتاع الكشك وكمل كلامه وهو بيهز دماغه هزة العالم بخفايا الأمور أصل الحكومة ما تصدق تلاقي فاتورة وتروح حاشرة فيها فلوس زيادة علشان الزبالة.

وأتعدل على الكرسي العالي اللي قاعد عليه جوة الكشك وقال: الغريب إننا بندفع فلوس زبالة مع النور، وكنا بندفعها مع المرحومة العوايد وطبعاً هيكون للزبالة دور جامد جداً في قانون الضرايب العقارية الجديد دة غير اللي بياخذه الزبال الأهالي ورغم كل دة الزبالة بتزيد، ورفع حاجبه اليمن وهو بيزغر لي وقال هما يا أستاذ بيلموا الفلوس علشان يرفعوا الزبالة من الشوارع ولا علشان يشتروا زبالة دول تانية ويبلونا بيها.

رزعت  قزازة الحاجة الساقعة على كونتر الكشك وقلت له: اخرس يا شحتة هاتودينا في داهية، قال لي لأ مش هيحصل على الأقل دلوقتي لأن الداهية لازم يكون لها فواتير يتضاف ليها رسوم للزبالة والحكومة لسة مافكرتش في حكاية فواتير تخص موضوع الداهية دة، عموماً يا أستاذ موضوع الرسوم دة مش هايقف على كدة.
وخرج من باب الكشك الضيق بجنبه علشان كرشه يعدي وما يتحشرش جواه ووقف جنبي وقال: لازم هايحصل فتاوى من الحكومة في موضوع رسوم المحكمة، ضحكت وخبطه بأيدي على كرشه خبطتين وقلت له: فتاوى إيه؟

 بص لي بصة العارف ببواطن المواضيع وقال: يا باشا ممكن الناس تبطل ترفع قضايا والسبوبة تضيع على الحكومة وشال أيدي من على كرشه وقال: على طول بالاتفاق مع المحليات هتركب الحكومة في كل بيت وقهوة ومصنع وشركة وكل مكان هيكون فيه ناس عدادات "ديجتال" طبعاً تقدر تحسب بطريقة عفاريتي كل حاجة بيعملها البني أدم وتصنفها إذا كانت صح ولا غلط وبعدها يجي كشاف زي بتاع النور والميه والغاز يحاسب الناس كل شهر.

مسكته بأيديه الاثنين بغيظ من "الجوهرة" –الاسم الحركي لدماغه- وهزتها جامد وسألته: وإيه تاني اللي هيحصل يا أبو العريف باشا؟ نزل إيديا وضحك بسخرية الخبير وقال: طبعاً بعض موظفين المحليات هتعمل سبوبة أخر حاجة من الموضوع دة، قلت له أزاي يا فالح؟؟، قال لي هيعملوا وصلات مضروبة للشقق زي بتاعة الدش والإنترنت قلت له يا سلام، قال لي لكن.... وسكت وراح داخل الكشك تاني بجنبه برضوة علشان ما يتحشرش وهو داخل قلت له لكن إيه يا سي أبو العريف، فقال وهو بيمد شفته اللي تحت لقدام المشكلة إن الكلام دة كله مش هيحصل.
بصيت بغيظ بعد ما ضاق خلقي منه وصرخت فيه لييييييييييه؟ فقال لي الجماعة بتوع المحظورة وأتباعهم هايرفضوا العدادت من أساسها، لأن العداد السليم لازم يحسب الحلال والحرام علشان يبقى شرعي، رحت رميلوا حساب الحاجة ساقعة بقرف وماشي.