نعت الفنانة اللبنانية ماجدة الرومي الملحن "ملحم بركات" عبر صفحتها الرسمية بالفيسبوك، وجاء نص نعيها كالتالي:

 

"من ماجدة الرومي إلى ملحم بركات.. امبارح، من عَزا أمي للعَزا فيك ومن دير القرقفي كفرشيما لكنيسة مار بطرس وبولس كفرشيما

قطعت المسافة بضيعتنا الصغيرة وانا قلبي عم يعصرو الاسى وأنا عم بسمع صوتك طالع من كل شارع وحي.

 

وصوتك نفسو نفسو يا ملحم يلي فرّحني العمر كلّو مبارح نفسو نفسو ما ترك بعينييّ دمعة وحدة إبْكِيها. 

 

وهيي نفسها نفسها شوارع كفرشيما يا ملحم يلي تمشّينا عليها بضيعتنا صغار وزهّرتلنا صغار وضحكتلنا صغار وهديتنا كل ربيع وكل أمل هيي نفسها نفسها مبارح شفتها خريف حزين مستعد يرمي كل وراقو ويبكي معنا ويكتب معنا ع صفحة تشرين الاول ٢٠١٦ :

 

(كلّو رايح وج الله بس وحدو اللي باقي)..

 

وشفت الدنيا حزينة عليك مثلنا وبتحبّك مثلنا ورح تشتقلك مثلنا وتقول لكل جيل جايي بعدنا".

 

وتابعت الرومي، "إنك من أعظم الأصوات يلي مرقت على هالشرق إنك صوت إذا رَق، بيبكّي الحجر واذا جن بتنحِنيلو العاصفة واذا تجلّى بتِخْضَر فينا جَنّات وانك جملة لحنية متفوّقة عريقة رح تبقى درس بالاصالة لكل عاشق موسيقى اليوم وكل يوم ولتنتهي الايام".

 

واختتمت، "أبو مجد يا حبيب اللبنانيي وكل العرب يا ابن كفرشيما البار مهما بعّدتنا الأيام رح نرجع نلتقي هيدا إيماننا بالله، وحتى نلتقي لنغني للأبد أمجاد الرب، بسألك بمحبّة طالعة من نص قلبي تِقبَل منّي بها اليوم الحزين كتير.. تقديري العظيم لفنك الأصيل لصوتك العالمي ولكل يلي كنتو بها الحياة".